O Concello de Tomiño oferta para o mes de marzo sete cursos de alfabetización dixital a través da súa aula ceMIT. Os cursos están organizados con diferentes asociacións tomiñesas así o seu lugar de impartición variará en función de con quen esté coorganizado.
Teremos o curso de "iniciación á informática e a internet" organizado xunto coa Asociación Veciñal de Pinzás e que polo tanto se desenvolverá nesta parroquia entre os días 27 de febreiro e 8 de marzo. O seu horario será de 18h00 a 20 horas no local da asociación na praza da igrexa e con el preténdese que o usuario/a sexa capaz de manexar de forma básica un ordenador ademáis de identificar os servizos electrónicos que ofrece a internet.
Este mesmo curso realizarase no Campo da Feira, nas instalacións habituais da Aula, pero dirixido para as usuarias do Programa Clara que ven desenvolvendo o Concello de Tomiño en colaboración co Instituto de la Mujer. Así entre os días 19 e 30 de marzo desenvolverase este curso en horario de mañán. En horario de tarde estes mesmos días levarase a cabo no local da Asociación Cultural "Perpetuo Socorro" de Vilameán xa que se desenvolve en colaboración con este colectivo.
As actividades da Aula Cemit de Tomiño do mes de marzo completaranse con dous cursos de "correo electrónico" para os días 27 e 28 de febreiro en horario de mañán e para os días 12 e 13 de marzo en horario de tarde. O lugar do curso será o Campo da Feira e está organizado xunto coa Asociación de Mulleres Rurais de Tomiño. O obradoiro centrarase no coñecemento do funcionamento do correo electrónico.
Con elas tamén se organiza o curso de "mensaxería instantánea" que a diferenza do anterior permitirá aos asistentes empregar ferrramentas de mensaxería instantánea como o messenger ou o skype. Este curso terá dúas turnas, unha de mañán nos días 29 de febreiro e 1 de marzo e outra de tarde os días 14 e 15 de marzo.
A aula CeMIT sitúase nas instalacións da OMIX no Campo da Feira en Tomiño e salvo que se esté impartindo algún cursos funciona como unha aula aberta e gratuita na que un axente TIC asesora e axuda aos usuarios.
A Alcaldesa de Tomiño, Sandra González, reseña a "funcionalidade destes cursos de alfabetización dixital que achegan as ferramentas básicas para introducirse no mundo informático e que ademáis o fan desprazándose os medios ao lugar dos usuarios/as, factor este a resaltar".