O Baixo Miño mobilízase co galego: autobuses dende A Guarda para a manifestación do 17 de maio en Santiago

A plataforma Queremos Galego fai un chamamento á cidadanía a participar na manifestación nacional en defensa da lingua galega, que terá lugar o próximo 17 de maio, coincidindo co Día das Letras Galegas, en Santiago de Compostela. A mobilización concluirá cunha gran foliada na Praza do Obradoiro, coa presenza de pandereteiras, baile e música tradicional.

Desde a comarca do Baixo Miño está prevista a saída de autobuses dende A Guarda, que realizarán paradas en O Rosal, Tomiño e Tui para facilitar o desprazamento ata a capital galega. As persoas interesadas poden anotarse chamando ao teléfono 986 610 465.

A plataforma subliña que este 17 de maio debe marcar un punto de inflexión na loita pola normalización lingüística en Galiza. “Queremos Galego” denuncia a actual emerxencia lingüística e os incumprimentos sistemáticos por parte da Xunta de Galicia no ámbito educativo, sanitario, xudicial, administrativo e cultural respecto aos acordos sobre o uso do galego.

"A forza que amosemos como sociedade será clave para reverter esta situación. Temos que facer da rúa unha festa e unha reivindicación colectiva que obrigue á Xunta a reaxir", sinalan desde a organización, que convida a todos os sectores sociais, culturais e educativos a encher Compostela de compromiso coa lingua propia de Galiza.