A Asemblea da Comunidad de Montes de Viladesuso rexeita a construción dos Parques Eólicos que afectan o seu monte e a Serra da Groba

O pasado día 12 de febreiro celebrouse a Asemblea Xeral Ordinaria das comuneiras e comuneiros do monte veciñal en man común de Viladesuso. Ante a ameaza que supón o proxecto do parque eólico Torroña I, que afectaría directamente aos montes das parroquias de Burgueira e Viladesuso, tratouse o asunto  para informar a veciñanza e tomar decisións ao respecto.

En primeiro lugar cabe destacar que o 18 de decembro de 2020 publicouse na páxina web da Consellería de Medio Ambiente o documento  inicial do parque eólico Torroña I. Desde ese intre, a comunidade de montes informou a veciñanza da existencia deste proxecto (xa que nin a empresa nin a Xunta o fixeron) e das posibles consecuencias e conflitos que poden ocasionar, tanto para a parroquia de Viladesuso como para todo o seu entorno.

Esta infraestrutura integraría catro aeroxeneradores de 230 metros cada un na súa cota máis alta, situados a menos de 800 metros das vivendas do barrio de Os Preáns e do Sobral, e a menos de 2.000 metros do Camiño de Santiago pola costa. En canto o lindeiro proposto como poligonal do parque, afectaría a máis da metade da parroquia, que pasaría a formar parte do propio polígono.

As afeccións e consecuencias máis relevantes que implicaría a posta en marcha deste proxecto, que non as únicas, serían:

Sobre os acuíferos e mananciais dos que se abastecen as persoas e negocios da zona. Tanto as obras de construción das plataformas e liñas de evacuación coma a posterior posta en funcionamento dos aeroxeneradores poñen en risco un recurso básico para a vida, que é a auga. Todos os veciños ven con fonda preocupación esta ameaza de cara ó abastecemento sostible da traída veciñal. Esta comunidade de usuarios de augas esta formada por máis de 220 enganches de vivendas e negocios, entre os que se inclúen dous hoteis, dous restaurantes, unha cafetería, dúas tendas/bar, dous albergues de peregrinos e unha gasolineira.

Nun contexto de cambio climático, de secas cada vez máis prolongadas e choivas máis escasas, este tipo de proxectos alteran e poñen en risco os acuíferos e seu entorno, provocando impactos por exemplo nos cabalos salvaxes, os “garranos” que pacen pola nosa serra e teñen nestes regatos e charcas un recurso fundamental nas épocas máis secas do ano, e sabendo que é un patrimonio vivo que corre grave risco de desaparición pola falta de conservación e destrución  dos hábitats como xa demostraron investigadores da Universidade da Coruña en estudos recentes ante a Comisión Europea, sería irresponsable contribuír a súa desaparición.

Paixasísticamente, o impacto visual que supón unha fileira de aeroxeradores de 230 m polo cumio dun monte da costa, ao pé do cal transcorre o Camiño de Santiago é inaceptable e a calidade de vida da que agora a veciñanza desfruta, veríase afectada de maneira irreversible polo continuo zumbido das pás e o ruído dos engranaxes da maquinaria, que co paso dos anos será maior.

                O impacto sobre o rico patrimonio que atesoura o noso monte: mámoas, castro, petróglifos e que é sistematicamente infravalorado e incluso ignorado  nos proxectos coñecidos.

                A exposición ao público dos parques eólicos Albariño I e Merendón na Serra da Groba, e outros moitos ao longo do país, están provocando unha forte oposición a instalación de novos proxectos por moitos motivos, entre eles, a escasa transparencia e información, as prácticas fraudulentas e intimidatorias por parte das empresas eólicas, as sentenzas xudiciais desfavorables contra diferentes parques, a falta de garantías e a perda de dereitos das comunidades locais, a falta de avaliación ambiental, patrimonial e socioeconómica.

                Incluso as críticas de entidades como o Observatorio Eólico de Galicia ou Consello da Cultura Galega poñendo en evidencia o Plan Eólico de Galicia, mostran que algo non se esta facendo ben.

                Por todo o exposto e  ante esta realidade a Asemblea da Comunidade de Montes de Viladesuso acordou  de forma unánime.:

1. Rexeitar a construción do parque eólico Torroña I no seu monte e de calquera outro proxectado na Serra da Groba.
2. Apostar por un desenrolo das enerxías renovables baseado nu modelo participativo e xusto dende o punto de vista social, económico e ambiental, rexeitando o modelo actual que só busca o beneficio das grandes empresas a costa do expolio e a degradación dos nosos montes.