A Asociación Avelaíña realizou máis de 130 intervencións en Tomiño no que vai de ano

En Galicia case 60.000 persoas contan cun certificado de discapacidade por enfermidade mental, arredor de 24.500 na provincia de Pontevedra, o que a sitúa como a segunda causa de discapacidade despois da física. Dende hai 25 anos, a comarca do Baixo Miño conta co encomiable labor da Asociación Avelaíña, unha entidade sen ánimo de lucro declarada de Utilidade Pública en 2010 que presta importantes servizos de atención a persoas con enfermidade mental, familiares e profesionais asociados. No que vai de 2021, realizaron máis de 130 intervencións en Tomiño, unha cifra que acadou os case 250 servizos ao longo de todo 2020: 59 intervencións de información, 174 asesoramentos e 14 acompañamentos   integrais. A asociación conta no Concello cun servizo de información e asesoramento.

“O seu labor é fundamental para a nosa veciñanza sobre todo nos últimos anos, cunha crise sanitaria que foi especialmente dura coas persoas con problemas de enfermidade mental”, salienta a alcaldesa, Sandra González. Por este motivo, co gallo do Día Mundial da Saúde Mental, o Concello quere agradecer o labor tan encomiable que está a facer a Asociación Avelaíña no municipio e no Baixo Miño. Precisamente un dos logros desde 2021 é a posta en marcha dunha Unidade de Saúde Mental na comarca que dará cobertura a toda a poboación, cunha reorganización dos cupos sanitarios e evitando desprazamentos moito máis longos aos pacientes que se tiñan que desprazar ata o de agora a Vigo.

Avelaíña conta con máis de 20 profesionais, máis de 400 socios e socias, persoas con enfermidade mental, familiares, coidadores e coidadoras, achegados e persoas sensibilizadas coa problemática. Na actualidade presta, entre outros, servizos de rehabilitación psicosocial, de apoio comunitario, de atención domiciliaria, de respiro familiar, de acompañamento integral, de orientación e integración laboral, de información e asesoramento, de ocio e deportes ou de apoio psicolóxico. Ademais ten en marcha diferentes campañas de sensibilización e leva a cabo o proxecto de ‘Promoción da autonomía persoal en persoas con enfermidade mental grave’, co que trata de instaurar hábitos de vida saudables e promocionar o uso axeitado dos recursos comunitarios da contorna.