A Asociación Vontade realiza o servizo de transporte adaptado a 16 persoas dos concellos do Baixo Miño e limítrofes

Este servizo é posible realizalo grazas ao cofinanciamento da Xunta de Galicia a través dos fondos do 0,7% do IRPF da declaración da renda procedentes das persoas contribuíntes que marcaron o cadro de “Actividades de interese xeral consideradas de interese social”.

A Asociación de Persoas con Discapacidade Vontade leva a cabo dende fai uns anos o Programa de Transporte Adaptado co fin de mellorar a mobilidade das persoas con discapacidade e achegar os servizos de promoción da autonomía.

A través deste servizo que ofrece Vontade dase cobertura a todas aquelas persoas maiores de 16 anos, con discapacidade física e imposibilidade de utilización de trasporte público, que precisen transporte para acceder aos servizos de promoción da autonomía realizados no Centro de Recursos da Asociación. Este servizo da cobertura a un total de 16 persoas dos Concellos do Baixo Miño (A Guarda, O Rosal, Tomiño, Tui e Oia), así como dos concellos limítrofes de Salceda de Caselas, Gondomar, Nigrán e  Baiona.

Para poder levalo a cabo, Vontade conta cun cofinanciamento da Xunta de Galicia de 4.000 euros procedentes da convocatoria de subvencións que as persoas contribuíntes derivan marcando a X Solidaria na declaración da renda. Deste xeito contribúen a que as persoas con discapacidade poidan acceder a un servizo de promoción da autonomía  e diminuír as situacións de illamento social que sofren debido ás características xeográficas da contorna.

Ademais, este ano, a COVID-19 e o período de confinamento tiveron un grande impacto nas persoas con discapacidade, paralizando os servizos, véndose privadas dos seus espazos de interacción social e afectando directamente á súa saúde física, cognitiva e emocional. Por esta razón se fai aínda máis importante e necesario que as persoas poidan acceder a actividades e recursos que lles permitan diminuír os efectos producidos nestes meses, reforzar as súas capacidades e contribuír ao mantemento da autonomía.