A CONSELLERÍA DE CULTURA E EDUCACIÓN PON EN VALOR A CREACIÓN MUSICAL GALEGA DA MAN DO GUITARRISTA SAMUEL DIZ

Este proxecto de investigación contén un conxunto de elementos que, segundo afirmou, "van facer del un traballo de referencia e enormemente útil, singular e simbólico". A este respecto o secretario xeral destacou "o labor de recuperación e de aposta pola difusión social da nosa creación musical histórica, que desde a Secretaría Xeral de Cultura consideramos un aspecto fundamental para a nosa construción cultural".

Talentos actuais
Ao mesmo tempo, o disco constitúe "unha vía de apertura cara á contemporaneidade", dixo en referencia á "proposta dun son para a guitarra do compositor Fernando Buide, que nos abre os ollos á enorme capacidade que existe nestes momentos no plano musical en Galicia". O talento actual chega tamén da man do propio Samuel Diz, "guitarrista con ampla experiencia no plano da difusión da música, nun labor que desenvolve fundamentalmente nun lugar de tanta tradición cultural como é Tui".

"Polo tanto -engadiu- estamos ante un proxecto de historia e de futuro, no son das cordas da guitarra". "E ese tamén constitúe un elemento que ten de valor o disco: incorporar ao noso imaxinario instrumental propio un instrumento que xa é evidente que forma parte e arte da nosa creación musical, enriquecéndoa e outorgándolle a súa sonoridade", concluíu.

Un canto á guitarra galega
Guitarra Clásica Galega fai un percorrido polo pasado, presente e futuro do instrumento na nosa cultura. Trátase dnha viaxe pola nosa historia, da man do recoñecido intérprete Samuel Diz, ao tempo que constitúe un canto á guitarra galega que non fora formulado ata o de agora.

O disco presenta unha recompilación de obras fundamentais desde a década dos 20 no exilio cubano ata o século XXI, coa nova xeración de compositores galegos, a través de figuras como Rosa García Ascot, Jesús Bal y Gay, Paco Barreiro, Tino Prados, Manuel Herminio Iglesias ou Fernando Buide,

Samuel Diz Sierpes nace en Tui en 1986. No ano 2009 gradúase no Conservatorio Superior de Música Manuel Castillo de Sevilla e completa a súa formación ao lado de grandes mestres como Alen Garagic, Daekun Jang e José Luíi Rodrigo. Na actualidade é director do Festival Música no Claustro de Tui.