A Deputación adxudica as obras de mellora da seguranza viaria na EP-2502 Cerquido-Ribadelouro en Tui por un orzamento de 435.000 euros

Despois de inaugurar esta semana a mellora da EP-3001 en Rebordáns, a Deputación continúa a mellora das estradas provinciais ao seu paso polo Concello de Tui coa contratación das obras que permitirán incrementar a seguranza viaria na EP-2502 Cerquido-Ribadelouro. A Xunta de Goberno vén de adxudicar estes traballos por un orzamento de 434.998€, que asumirán a institución provincial (70%) e o Concello (30%). A actuación enmárcase na transformación que está a realizar a Deputación nas estradas provinciais seguindo o seu modelo de mobilidade “no que as persoas son o centro das actuacións”, como destacou a presidenta Carmela Silva.

As obras inclúen a creación dunha zona de convivencia con preferencia peonil na contorna do Centro Cultural e da Igrexa de Santa Comba, así como a mellora do trazado coa ampliación do radio das curvas máis pechadas e o deseño dunha beirarrúa máis ancha para separar o tráfico peonil. Tamén se acometerá a renovación da iluminación, recollida das pluviais e redutores de velocidade. Os traballos realizaranse nun treito de 200 m, dende o pq 1+950 ao 2+150, e incluirán así mesmo o acondicionamento do viario municipal que a cruza neste punto para recoller o tráfico dos vehículos que se desviarán coa peonalización.

Máis polo miúdo, a mellora da mobilidade peonil acadarase mediante as obras de demolición do viario EP-2502 na zona de actuación, para peonalizar o ámbito, así como das beirarrúas e da parte da sección da calzada necesaria para a ampliación da senda no viario municipal. Executarase o pavimento da nova ordenación deseñada, que combinará formigón con lousas de pedra na zona peonil, e  no viario municipal senda de formigón coloreado.