A Guarda é un dos sete municipios que recibirá axudas do Plan Concellos para a transformación do seu espazo público

O Goberno da Deputación de Pontevedra acaba de dar luz verde a un investimento de 1.462.641€, ao abeiro do Plan Concellos, que se destinarán a sete municipios da provincia. Un deles é o concello da Guarda que, grazas a estes recursos, poderá realizar actuacións para transformar o espazo público e crear dotacións municipais. 

A Guarda disporá de 317.955 euros que serán destinados a realizar a primeira fase da mellora da mobilidade na rúa Coruña, co obxectivo de gañar espazos para os peóns, mellorando así a seguridade viaria desta rúa e as redes de servizo. Entre as principais actuacións que se levarán a cabo están a dotación dun percorrido peonil continuo e seguro, o incremento do ancho das beirarrúas, a eliminación de barreiras arquitectónicas, a mellora dos pasos de peóns e a creación de varias zonas axardinadas. 

Ademais do municipio da Guarda, os investimentos do Plan Concellos aprobados pola Deputación chegarán a outros seis municipios, que son Poio, Marín, Cerdedo-Cotobade, Covelo, Dozón e Pontecesures que, con estes fondos provinciais, tamén poderán transformar o seu espazo público.