A Guarda mellora as instalacións do parque deportivo do Codesal

O Concello da Guarda continúa mellorando o Parque deportivo do Codesal, no cal se realizou a pasada fin de semana a Superliga Galicia de futevolei.

Despois das recentes obras de reforma dos vestiarios do Parque deportivo do Codesal, un espazo de uso público onde se teñen realizado diferentes tarefas para adecuar o terreo para a práctica de diferentes modalidades deportivas coma o volei, o fútbol, o balonmán ou a petanca, o concello ven de instalar tamén novos elementos de calestenia. Este espazo foi cedido ao concello da Guarda por un período de 15 anos pola Entidade Local Menor de Camposancos despois do convenio asinado en xuño de 2020.

Estas instalacións deportivas, ven incrementadas as súas funcionalidades cunha significativa mellora nos espazos para a práctica deportiva, unha pista máis de volei praia(cun total de 3), outra de balonmán praia e outra de fútbol praia. 

Deste xeito se teñen incrementado as pistas existentes para a práctica da Petanca, instalacións que emprega o Clube de Petanca O Caldeiro, o clube con maior número de deportistas federados nesta modalidade en Galicia, con máis de 40 membros é o primeiro clube para a práctica deste deporte na Comarca do Baixo Miño.

O alcalde da Guarda, Antonio Lomba, adiantou tamén que se está a preparar un proxecto para unha zona con equipamentos infantís, que terá unha tirolina e diversos elementos para o lecer dos máis pequenos.

O concello da Guarda considera que este é un dos espazos con maiores posibilidades de consolidarse como punto de encontro interxeracional, xa que as instalacións permiten a práctica deportiva de  diferentes colectivos que abarcan idades moi diferentes.  O Parque Deportivo do Codesal ofrece á cidadanía  desfrutar de diferentes actividades  nun entorno paisaxístico  natural (deporte, paseo, lectura, fotografía…) actividades todas elas  seguras e moi necesarias neste momento de pandemia, seguindo así a liña estratéxica marcada polo equipo de goberno de mellora das instalacións deportivas e das instalacións que posibiliten aos veciños e veciñas da localidade espazos seguros ( parques, sendas, zonas deportivas..) tal e como establecen as autoridades  sanitarias.

A mellora deste espazo foi realizada conxuntamente con fondos propios do Concello da Guarda e tamén cunha  importante subvención con cargo ao Plan Concellos 2020 da Deputación de Pontevedra.