A Guarda realizará melloras na rede de abastecemento municipal de auga

O concello da Guarda, seguindo a liña de traballo de mellora dos servizos municipais, realizará un investimento de 50.000 € destinado á modernización e mellora da rede deabastecemento municipal. Para esta actuación o concello fará unha contribución de 4.000 € e a Xunta de Galicia, a través dun fondo adicional ao Fondo de Cooperación Local, fará unha achega de 46.000 €.

Tal e como recomenda o Plan de Seca do concello da Guarda, aprobado o pasado ano, é necesario traballar en distintos frontes para garantir o subministro de auga en situacións climáticas cada vez máis adversas motivadas polo cambio climático. Así, por exemplo, no verán do ano 2022 o concello conectaba o novo pozo dos Casás, cun caudal aproximado de 300 m³ diarios, ao depósito regulador do Torroso. Este pozo axudou a levar mellor a situación de seca do verán do 2022. 

No mesmo ano 2022 o concello encargaba unha -Auditoría Municipal de Abastecemento encamiñada a elaboración de Plans de Actuacións para Minimizar as Perdas de Auga-. Un documento xa recomendado no Plan de Seca por ser o control das as perdas de auga un dos factores que máis influe na optimización do subministro e por tanto no aproveitamento da auga.

A Auditoría Municipal do Abastecemento propón un cronograma de actuacións a catro anos para mellorar a rede de subministro de alta presión do concello da Guarda. Coa actuación proposta nesta primeira fase darase inicio ao -Plan de Actuación para Minimizar as Perdas de Auga do Concello da Guarda- que deberá ter continuidade no futuro e que nos permitirá ser máis independentes do subministro de auga de Tui e ter un aforro importante tanto de auga como en reparacións de fugas na rede.