A Guarda subscribe o protocolo de colaboración entre a Garda Civil e a Policía Local para a protección de vítimas de violencia de xénero

A subdelegada do Goberno en Pontevedra, Maica Larriba, presidiu esta mañá a Xunta Local de Seguridade do Concello de A Guarda na que se subscribiu o protocolo de colaboración entre as Forzas e Corpos de Seguridade do Estado e a Policía Local no marco do programa de Seguimento Integral das Vítimas de Violencia de Xénero. Este protocolo de colaboración é necesario para formalizar a adhesión do municipio ao Sistema VioGén. O documento foi asinado polo alcalde da localidade, Antonio Lomba, e polo coronel xefe da Comandancia da Garda Civil de Pontevedra, Simón Venzal. Estiveron tamén presentes no acto o concelleiro de servizos á cidadanía, Miguel Ángel Español, e a concelleira de Igualdade, Fátima Rodríguez, así como mandos locais da Garda Civil e responsables da Policía Local. Con esta adhesión, A Guarda convértese no décimo quinto municipio da provincia en formar parte deste programa de protección de vítimas de violencia de xénero do Ministerio do Interior.

Maica Larriba aproveitou a Xunta Local de Seguridade para felicitar ao alcalde e a todo o equipo de goberno por “materializar o seu compromiso coa erradicación da violencia machista e coa protección das vítimas asinando este protocolo, sumándose así aos restantes concellos da provincia que xa forman deste sistema”. “As administracións debemos traballar de maneira coordinada e conxunta para frear unha das eivas máis importantes da nosa sociedade, a violencia contra as mulleres, e para iso é fundamental seguir garantindo recursos e esforzos. Porque fronte a violencia non cabe tolerancia, nin xustificación, nin banalización”, sinalou a subdelegada. O alcalde, Antonio Lomba, subliñou a “necesidade de combater esta lacra social” e lamentou que “este tipo de acordos continúen a ser necesarios”.

A firma do protocolo que hoxe tivo lugar é o primeiro trámite que deben formalizar todos aqueles municipios que desexen integrarse no Sistema VioGén. O protocolo recolle o reparto de funcións e asignacións de vítimas entre as Forzas e Corpos de Seguridade. Larriba destacou a importancia deste documento, que permite que “os corpos locais e estatais poidan compartir información e recursos e establecer uns criterios básicos de colaboración e coordinación, de xeito que se garanta o cumprimento eficaz das medidas xudiciais de protección ás vítimas de violencia de xénero”. En particular, o protocolo delimita as funcións da Policía Local no ámbito da violencia de xénero e define o seguimento e reparto dos casos, o que permite sumar máis efectivos e recursos á protección das vítimas.

Doutra banda, Larriba fixo fincapé no “firme compromiso do Goberno de España coa erradicación de calquera forma de violencia machista”. Neste sentido, a subdelegada lembrou que desde 2018, “este Goberno destinou máis de 60 millóns de euros á loita contra a violencia de xénero en Galicia”. Dos fondos do Pacto de Estado para a loita contra a violencia machista A Guarda recibiu 13.905,68€ en 2021. “Un exemplo –explicou- do compromiso por apoiar aos Concellos nesa labor de acompañamento ás vítimas que realizan co obxectivo de que estas saiban que non están soas”. Así mesmo, a subdelegada quixo lembrar tamén “o fundamental rol que desenvolve a Garda Civil na protección e asistencia a todas as mulleres vítimas de malos tratos neste concello e en toda a provincia”.

A subdelegada informou que na actualidade e segundo os datos recollidos no Sistema VioGén, na Guarda, contabilízanse a día de hoxe 13 casos activos de violencia de xénero. Esta cifra supón case o 1 % dos casos activos na provincia de Pontevedra, onde se contabilizan 1.316 casos, con 1.287 vítimas.

Para completar a súa adhesión ao Sistema VioGén, o Concello deberá asinar agora o convenio co Ministerio do Interior para o acceso ao Sistema de Seguimento Integral en casos de violencia de xénero.

O Sistema VioGén
O Sistema VioGén ten como finalidade establecer unha rede nacional que permita o  seguimento e protección de forma rápida, integral e efectiva das mulleres vítimas de malos tratos, e dos seus fillos e fillas, en calquera parte do territorio español, así como de aglutinar ás institucións públicas competentes na materia de violencia de xénero e integrar a información dos diferentes casos. O Sistema tamén realiza predicións do risco de calquera vítima e, en función dese nivel, efectúa un seguimento e protección. VioGén desenvolve ademais un labor preventivo con avisos, alertas e alarmas cando se detecta algunha incidencia ou acontecemento que pode poñer en risco a integridade da vítima.