A Mesa do Camiño reunida esta semana en Tui avaliou a situación actual e as perspectivas no ámbito do Camiño de Santiago e a peregrinación

A Mesa Local do Camiño reuniuse o pasado martes 16 de novembro na Casa do Concello de Tui, nunha xuntanza presidida polo alcalde, Enrique Cabaleiro, e na que participaron os representantes dos distintos sectores – aloxamentos, restauración, servizos aos peregrinos, igrexa e movemento asociativo xacobeo – que forman parte da Mesa. Tamén estivo presente un representante de Turismo de Galicia, neste caso Ildefonso de la Campa, director de Administración do Xacobeo. O obxectivo foi avaliar a situación actual e as perspectivas no ámbito do Camiño de Santiago e a peregrinación, un sector estratéxico na localidade.

A reunión comezou coa valoración por parte do rexedor tudense, que comezou aportando que, segundo os datos achegados dende a Oficina Municipal de Turismo, no que vai de ano foron atendidos un total de 43.584 visitantes, deles 13.956 peregrinos (32.1%) e 29.628 (67,9%) turistas. No que atinxe aos peregrinos 7.751 (55%) eran de procedencia nacional namentres que 6.205 (44,5%) eran de orixe internacional o que acredita a importante recuperación no número de peregrinos que realizan o Camiño Portugués logo dos meses de pandemia. Enrique Cabaleiro informou tamén do desenvolvemento dos plans municipais de apoio ao sector, comunicando que as axudas Reactiva II supuxeron unha achega de 238.686,86 euros por parte do Concello dirixidas aos establecementos comerciais, hostaleiros e negocios afectados polo peche perimetral e a conseguinte baixa de facturación.

Comentou tamén outras accións arredor do Camiño, dende o mantemento da súa traza, ao impulso de actividades (como exposicións, edición do material didáctico e divulgativo sobre a peregrinación de León de Rosmithal, o Foro do Camiño Portugués, etc.) así como os proxectos de futuro con incidencia na ruta xacobea ao seu paso por Tui: humanización da fronteira e Avenida de Portugal proxecto do Ministerio de Transportes, Mobilidade e Axenda Urbana, creación do centro Cárcere Vello de acollida a visitantes e peregrinos incluído no Plan Nacional Xacobeo 2021-2022 do Ministerio de Industria e Turismo xunto con Turismo de Galicia da Xunta de Galicia ou a inmediata actuación nas rúa Antero Rubín e Cóengo Valiño cun investimento superior aos 800.00 euros.

Tamén se informou sobre o funcionamento do perfil “Camiño Portugués Tui” principalmente en facebook e tamén en instagram. O grupo de facebook conta con máis de 4.100 membros e unha grande actividade, con máis de 500.000 visualizacións nos últimos meses.

O representante de Turismo de Galicia, Ildefonso de la Campa, informou da próxima presentación do Plan Director do Camiño de Santiago, así como das medidas impulsadas dende a Xunta de Galicia a prol do sector e da reactivación das rutas xacobeas.

De seguido houbo unha quenda de intervencións dos asistentes que incidiron na necesidade de incrementar a promoción da cidade e especialmente na súa preocupación polos problemas de mobilidade en transporte público que afectan á nosa cidade pois é moi dificultoso chegar a Tui tanto dende Santiago como dende Porto o que incide negativamente na competitividade turística da cidade.

O alcalde, Enrique Cabaleiro, manifestou a súa satisfacción por esta reunión pois permitiu coñecer de primeira man a situación deste sector e continuar o traballo que se impulsa a través da Mesa do Camiño de Santiago en Tui de cooperación entre os diversos sectores implicados.