A U.D Ribera inaugura a tempada co IX Trofeo Vila do Rosal

A U.D Ribera e o Concello do Rosal organizan este domingo ás 18.00 o IX Trofeo Vila do Rosal no campo de fútbol A Mata, un torneo que servirá como pista de saída da tempada 21/22 e no que o clube rosaleiro medírase ao Erizana. Antes do partido, ás 17.15, presentaranse a todos os xogadores e xogadoras, case 170 mozos e mozas. A alcaldesa, Ánxela Fernández, móstrase moi feliz por este trofeo, xa que “por fin podemos volver desfrutar dun partido de fútbol con público” e agradece a U.D Ribera “o seu gran traballo polo deporte e a educación en valores no Rosal”.

Durante a xornada tamén se aproveitará para homenaxear aos xogadores da tempada 1992/93, unha das mellores da historia do fútbol rosaleiro e que loitaron por gañar o título da primeira autonómica ata o final. O Concello recibirá xunto ao club aos 20 integrantes daquel equipo e faralles entrega dunha serie de agasallos. Desta maneira, afirma a alcaldesa, “queremos premiar e recoñecer o exemplo e a loita dos grandes futbolistas da nosa historia, así como, do indispensable equipo que tiñan detrás”.

A rexedora espera que este fin de semana sexa o primeiro da volta á normalidade aos campos de fútbol. “Esperamos poder volver aos tempos nos que o fútbol no Rosal era unha cita habitual de todos os nosos fin de semana”, conclúe.