A Xunta activa a formación laboral de 20 persoas desempregadas da Guarda co obradoiro Manuel B. Portela VII

A Xunta de Galicia, a través da Consellería de Emprego e Igualdade, activou na xornada de hoxe a formación laboral de vinte persoas desempregadas do municipio da Guarda coa posta en marcha do obradoiro de emprego de formato dual Manuel B. Portela VII, que conta cun investimento de 347.000 euros.

O delegado territorial da Xunta en Pontevedra, Luis López, acompañado do alcalde da Guarda, Antonio Lomba, e do director do obradoiro, Adolfo Martínez, presidíu esta mañá o acto de inauguración desta iniciativa laboral, orientada á mellora da empregabilidade a través da formación específica en oficios.

“O emprego é un dos grandes eixos da acción de goberno da Xunta e por iso seguimos apostando por este modelo formativo, que outorga coñecementos e experiencia aos participantes e favorece a súa inserción laboral en sectores con moita saída na Guarda e a súa contorna”, explicou o representante autonómico, que lembrou que a provincia de Pontevedra está arrancando nestas semanas unha vintena de obradoiros, que formarán a 400 persoas cun investimento de 6,6 millóns de euros.

O obradoiro de emprego Manuel B. Portela VII contará cos módulos de Atención Sociosanitaria a Dependentes en domicilio e institucións e Promoción Turística Local e información ao visitante A formación prolongarase durante nove meses e, ademais das ensinanzas teórico-prácticas, ofertarase a posibilidade de realizar prácticas en empresas da contorna ao seu remate grazas ao seu formato dual.

Luis López agradeceu aos participantes “a súa implicación e gañas de aprender un oficio mellorando os seus coñecementos para outorgarse máis oportunidades no mercado” e amosouse convencido de que “aproveitarán estes nove meses ao máximo para adquirir coñecementos que poden ser fundamentais para o seu futuro”. Neste senso, recalcou o “compromiso” da Xunta coa creación de emprego e a xeración de riqueza no sur da provincia de Pontevedra, “algo que demostramos con feitos, tal e como se confirma cos tres obradoiros e 23 cursos de formación para desempregados que temos en marcha agora mesmo”.

“Damos cumprida resposta ao que pide a cidadanía e ofertamos un programa de formación moderno, dual, orientado a xente sen traballo para mellorar a súa empregabilidade, posibilidades de futuro e inserción laboral, que ademais van recibir unha remuneración durante nove meses e que contribuirán ao beneficio de todas e todos con servizos públicos e atencións sociais”, concluíu o delegado territorial.