A Xunta elimina un punto de vertido de augas residuais ao océano atlántico, no Concello de Oia

A Xunta, a través de Augas de Galicia, eliminou un punto de vertido de augas residuais ao océano Atlántico, no tramo da desembocadura do río Mougás, no concello pontevedrés de Oia. O persoal do Programa de Control de Vertidos constatou a existencia desta incidencia no transcurso dos labores rutineiros de inspección no ámbito territorial dos concellos integrados na Demarcación Hidrográfica Galicia-Costa.

Os técnicos do ente dependente da Consellería de Medio Ambiente e Cambio Climático constataron a existencia dunha deficiencia na infraestrutura de saneamento que vai grampada pola ponte sobre o río Mougás, no lugar do Porto. Ante esta situación, procederon a comunicar o problema ao Concello de Oia para que adoptase as medidas correctoras oportunas.

Tras informar desde o Goberno municipal da reparación da canalización afectada, o persoal de Augas de Galicia realizou unha nova inspección na que verificou a reparación do colector afectado, eliminando así este vertido a espazos do dominio público marítimo-terrestre da comunidade.