A Xunta participa nos actos do 350º aniversario do -Entremés famoso sobre a pesca no río Miño-

A Xunta de Galicia, representada polo secretario xeral de Política Lingüística, Valentín García, participou hoxe en Tui nos actos do 350º aniversario da publicación da obra A contenda dos labradores de Caldelas, máis coñecida como Entremés famoso sobre a pesca no río Miño, unha peza teatral de Gabriel Feixoo de Araúxo datada arredor de 1671, que pasa por ser a primeira escrita en galego. O libro Miño, río das letras, que sae do prelo co apoio da Consellería de Cultura, Educación e Universidade, inclúe unha edición facsímile desta peza.

O secretario xeral de Política Lingüística destacou durante a súa intervención que A contenda de Caldelas é testemuño do irmandamento dos pobos galego e portugués e das intensas e seculares relacións sociais e fraternais entre as dúas beiras do Miño”, unhas relacións “sempre apuntaladas por unha proximidade xeográfica pero sobre todo cultural e lingüística”, engadiu.

No acto de presentación da obra, enmarcado na celebración das festas patronais de San Telmo, participaron tamén o alcalde de Tui, Enrique Cabaleiro; o presidente da Asociación de Amigos do Couto Mixto, Luís García Mañá; o presidente da Fundación Lois Peña Novo, Xosé González Martínez; e o presidente da Cámara de Monçao, António Barbosa.

A seguir, descubriuse nos xardíns da Área Panorámica un monumento conmemorativo do 350º aniversario doado pola Escola de Canteiros de Poio e o gaiteiro Diego Alonso e o percusionista Ramón Corral ofreceron unha pequena actuación.