Abel Losada subliña a constante redución das cifras de criminalidade na Guarda

O subdelegado do Goberno en Pontevedra, Abel Losada, presidiu xunto co alcalde da Guarda, Roberto José Álvarez Carrero, a Xunta Local de Seguridade, a primeira na que participa neste municipio trala súa toma de posesión o pasado mes de decembro. Na xuntanza valorouse especialmente a mellora continua nas estatísticas de criminalidade neste concello, onde se produciu un descenso dun 14% dos delitos en 2023 con respecto ao ano anterior, situando así ao concello da Guarda nuns estándares de seguridade moi elevados. Losada destacou que as cifras son mellores incluso que as de 2019 o último ano antes da pandemia. Deste xeito, indicou que “un descenso tan importante sitúa este concello moi por debaixo das cifras medias de criminalidade do conxunto da provincia”. 

No encontro, no que participou tamén o coronel da Garda Civil, Simón Venzal e outros responsables da seguridade da Benemérita, do Concello e da Policía Local, deuse conta de que son xa dous os anos consecutivos nos que se reduce o número de infraccións penais rexistradas neste concello. Destacan as reducións nos delitos contra as persoas e contra liberdade. Non se produciu, de feito, ningún delito contra a liberdade sexual.

En canto aos delitos contra o patrimonio mantivéronse estables os roubos e hai unha substancial baixada dos furtos. Diante destas cifras, que evidencian a seguridade cidadá na Guarda, tamén se constatou un descenso dun 16% no número de persoas detidas e/ou investigadas pola Garda Civil.

Na Xunta de Seguridade destacouse a importancia da colaboración entre as Forzas e Corpos de Seguridade do Estado e a Policía Local en todos os ámbitos para loitar contra a criminalidade e tamén en materia de tráfico e seguridade viaria.