Actividades musicais, deportivas e relixiosas copan a primeira fin de semana de agosto na Guarda

A programación cultural comezou na noite do xoves no Centro Cultural da Guarda, onde se celebrou o XXXI Certame de Poesía Feliciano Rolán, organizado pola Agrupación Cultural Guardesa. A cita contou coa presenza das persoas galardoadas no concurso literario: Isaura Lago, Rocío Leira e Ramón Sandoval. A nota musical poñerana as pianistas María Alonso e Laura González, cunha actuación especial.

Festas na honra de San Caetano
O barrio da Cruzada da comezo ás Festas de San Caetano. Continuarán as xornadas festivas o venres, coa sardiñada a partir das 21.00 horas, seguida das actuación da orquestra Costa Blanca; e o sábado, coa gran verbena da man de Los Soprano e Ambar. Ámbolos dous días contarán co pasacalles a cargo do grupo de gaitas A Boalleira.

O domingo pola mañá será a quenda dos actos relixiosos, coa celebración da misa solemne ás 11.30 horas e a posterior procesión partindo da capela de San Caetano, acompañada polo grupo de gaitas A Boalleira e o coro parroquial. Xa pola tarde, a partir das 19.00 horas, realizaranse as tradicionais puxas e, tras delas, o grupo de pop-rock guardés Songodin's ofertará un concerto.

Deporte e cultura urbana
O sábado 5 de agosto será o gran día do deporte. Especialmente, daqueles relacionados coa cultura urbana no marco da terceira edición de Galifornia Beat, organizada por Skateboarding360 en colaboración co Concello da Guarda. O evento "multideportivo e multicultural", segundo o definen os organizadores, terá lugar na atalaia do porto guardés a partir das 10.00 horas e contará con competicións en tres modalidades de skateboarding: Street skate ou patinaxe de rúa; miniramp, na que os skaters fan uso de pequenas ramplas; e S.K.A.T.E, unha modalidade de competición a dúo na que os contrincantes poñen a proba a destreza do outro na realización de determinados trucos.

As actividades deportivas complétanse coa oferta de clases de break dance e a práctica de flyboard e hoverboard, dúas modalidades acuáticas que permiten elevarse sobre a auga e para cuxo desfrute é preciso inscribirse previamente a través da páxina www.flyboardvigo.com. Amais destas, as persoas que se acheguen á atalaia -na que haberá postos de artesanía, comida, bebida e inchables para os cativos- poderán presenciar as pintadas de graffitis e os concertos, que se celebrarán a última hora da tarde.

Primeiras actividades das Festas do Monte
As primeiras actividades deportivas das Festas do Monte serán tamén o sábado, a partir das 18.00 horas. Por unha parte, no pavillón das Solanas disputarase o Trofeo Festas do Monte de Hóckey Liña, con categorías senior e amateur. Paralelamente, partirá da Alameda da Guarda a tradicional Carreira Pedestre Popular, cuxa inscrición permanecerá aberta ata mañá ás 19.00 horas, na páxina www.trega.es. Tamén é posible a inscrición de xeito presencial, para o que as persoas interesadas deben achegarse ata a Alameda esta tarde entre as 18.00 e as 20.00 horas ou mañá entre as 17.30 e as 19.00 horas.

A Festa do Monte, con todo, arrincará oficialmente o próximo luns, 7 de agosto, co pregón inaugural a cargo dun responsable do Real Club Celta de Vigo, precedido pola benvida do alcalde do Concello da Guarda, Antonio Lomba. As grandes festas guardesas continuarán durante toda a semana, cunha programación deportiva, cultural e lúdica intensiva ata o 15 de agosto.