Alfonso Rueda apunta a Roberto Carrero como a alternativa a anos de inmobilismo e reivindica ao PP como opción de cambio, estabilidade, sentidiño e maioría para A Guarda

• O presidente do PPdeG reivindicou a Roberto Carrero e ao seu equipo como a alternativa a anos de inmobilismo e a opción do cambio, da estabilidade, do sentidiño e da maioría para os veciños da Guarda

• Sinalou que a candidatura do PP da Guarda non se presenta para repartirse áreas de goberno, senón para asumilas todas e poñelas a andar desde o primeiro minuto a partir do 28 de maio

• Recordando que xa nas últimas eleccións o PP foi a lista máis votada neste concello, Rueda sinalou entre as opcións para volver confiar na formación o feito de que Carrero ten preparación, iniciativa, ganas de axudar e, por enriba de todo, ofrece solucións e non problemas

• Afirmou que é momento de que o candidato popular asuma a alcaldía porque A Guarda necesita dun goberno de maioría, estable e preocupado polos cidadáns e non pola calculadora nin polas súas liortas internas

• O líder dos populares galegos fixo un chamamento aos seus a non perder o tempo no que non corresponde, como ocorre cun PSdeG que cada día ten un criterio diferente, cun BNG que busca continuamente afastar Galicia do resto de España e cunha serie de correntes que crean un partido novo cun nome diferente cada media hora

• Rueda asegurou non estar de acordo con esa división que os partidos de esquerda pretenden trasladar tamén á sociedade e neste sentido reivindicou que os gobernos unidos son os que mellor funcionan e que é moito máis o que une aos galegos que todo aquilo que algúns buscan para separalos

• Cómpre destacar que entre as actuacións que demostran que o Goberno galego estivo sempre xunto aos gardeses están a nova escola infantil, as melloras no colexio e no instituto, a activación do Xacobeo Transfer para o transporte de persoas, os avances na autovía A Guarda-Tui ou os investimentos no porto e na promoción turística do Camiño Portugués

ROBERTO CARRERO: “O 28-M HAI OS VECIÑOS TEÑEN QUE ELEXIR ENTRE O CAMBIO OU SEGUIR COMO ESTAMOS”

• O candidato á alcaldía reivindicou ao PP como a única alternativa seria, real e eficiente para garantir un novo rumbo na Guarda: “O 28 de maio os veciños teñen a oportunidade de elixir entre o cambio ou seguir como estamos, que é o que ofrecen indistintamente PSOE e BNG”

• Nesta liña, recordou que “votar BNG é votar PSOE e viceversa, porque o único que queren é que o PP non chegue á maioría absoluta para pactar entre eles”

• Carrero criticou que o socialista Antonio Lomba estivo durante os últimos catro anos “preocupado en exclusiva polas fotos e polas redes sociais”, mentres que o nacionalista Anxo Baz “protestou sen sentido e con covardía porque, ao final, o BNG apoiou ao PSOE en todo”

• Entre as súas propostas destacou a creación dun auditorio multiusos con diversas salas para cubrir as necesidades de espazos culturais da Guarda, así como un plan de recuperación patrimonial ou un centro integral de saúde

• Así mesmo, promete a construción dun complexo deportivo multidisciplinar que conte cun novo pavillón, pistas de tenis, campos de fútbol sala, pista de baloncesto, pista de carreira e muro de escalada