Alumnado de Ames coñece de preto a Eurocidade Cerveira-Tomiño grazas ao programa Erasmus+

O alumnado de terceiro ciclo do CEIP de Barouta, no concello de Ames, viviu unha xornada única de aprendizaxe e convivencia no corazón da Eurocidade Cerveira-Tomiño, unha iniciativa transfronteiriza que une Galicia e Portugal a través da cooperación institucional, cultural e educativa.

Esta viaxe, organizada ao abeiro do programa Erasmus+ Jean Monnet, tivo como obxectivo achegar aos nenos e nenas ao funcionamento das institucións locais de ambos lados do Miño, reforzar os lazos veciñais e descubrir o rico patrimonio natural e histórico que comparten Tomiño e Vila Nova de Cerveira.

Durante a visita, a rapazada tivo ocasión de entrar nas casas consistoriais dos dous municipios, coñecer o traballo institucional e intercambiar impresións coas autoridades locais. Tamén se achegaron ao sector económico coñecendo a empresa Casaita, representativa do viveirismo da zona, un dos motores económicos de Tomiño.

A xornada incluíu visitas a lugares emblemáticos como a Fortaleza de Goián, o Miradoiro do Cervo ou o Castelo de Cerveira, mesturando cultura, historia e paisaxe. Para completar a experiencia, o grupo participou en actividades ao aire libre como kayak, bicicleta e minigolf, convertendo a aprendizaxe en diversión.

A alcaldesa de Tomiño, Sandra González, e o presidente da Cámara Municipal de Vila Nova de Cerveira, Rui Teixeira, destacaron a importancia desta actividade: “Representa unha oportunidade única para que a mocidade descubra, viva e sinta o que significa compartir un territorio común. Son experiencias que constrúen vínculos desde idades temperás, fortalecendo a nosa identidade e proxectando un futuro baseado no respecto e a colaboración transfronteiriza.”

O CEIP de Barouta expresou o seu agradecemento aos dous concellos pola excelente acollida e pola colaboración activa, valorando positivamente a posta en marcha de iniciativas que promoven o coñecemento mutuo, o diálogo intercultural e a amizade entre comunidades veciñas.