Ana Pontón presenta a Carme Núñez como candidata á Alcaldía de Tui polo BNG nunha sala UNED que ficou pequena

A portavoz nacional, Ana Pontón, participou este martes na presentación da candidatura do BNG en Tui ás eleccións municipais do 28M, que encabeza Carme Núñez, convencida de que a cita coas urnas traerá un novo goberno do bloque na comarca capaz de abrir un tempo novo para un Tui esquecido.

“Carme é un exemplo de muller coherente, firme e constante e que conta cun equipo cun proxecto claro e innovador para Tui”- afirmou a portavoz nacionalista.

Foron decenas as persoas que tiveron que quedar portas afora deste acto de presentación no que tamén falaron o Respónsabel Local, Xosué Campos, o histórico concelleiro, Xose M. Tato e a propia candidata.

“Tui merece máis, merece un proxecto sólido, con ideas e propostas para mellorar sobre todo, a calidade de vida dos veciños e veciñas”, destacou Carme Núñez. “Exemplos do que somos capaces de facer, témolos ben cerca”, recalcou en referencia aos concellos de Tomiño e O Rosal, cuxas alcaldesas estaban presentes en primeira fila.

A candidata presentou unha lista renovada máis con experiencia, con moitos sentires diversos pero que teñen un nexo común: que Tui ten todas as condicións para ser un concello referencial e están dispostas a traballar por isto.

Ao rematar o cálido encontro houbo tempo para o convivio entre os máis de dous centenares de asistentes cunha chocolatada e petiscos de orixe local.

“Estamos moi agradecidos e ante unha oportunidade histórica para a que precisaremos de todas vos. Podedes contar co noso compromiso. Grazas e adiante!”- rematou entre aplausos a candidata.