As Socialistas de Tomiño acusan ó Goberno Municipal dunha nefasta xestión política e económica

As socialistas de Tomiño, no Pleno ordinario celebrado o pasado xoves, ante unha nova modificación de crédito, consistente nun suplemento de crédito por valor de 346.223,92 euros, para poder facer fronte a partidas orzamentarias que están sendo incrementadas polo aumento dos prezos dalgunhas materias primas, criticaron a postura do goberno nacionalista ante un grave problema económico no noso Concello.

" Si ben é certo que a situación actual, a nivel mundial era difícil de prever, tamén é certo que xa no Pleno onde se aprobou o orzamento municipal, quedou constancia de que este sería un ano compricado a nivel económico. Polo tanto, e con esta coxuntura, a voceira socialista no Concello de Tomiño, Violeta de Santiago, califica de nefasta xestión , froito de decisións políticas, encadenar modificacións de crédito levadas ó Pleno para acometer obras non prioritarias cun claro afán electoralista neste ano de precampaña"

O efecto destas decisións é que na  actualidade o noso Concello teña as arcas municipais valeiras e o remanente de tesourería de máis de 2 millóns de euros fundido. Ata o punto de que pode perigar o o pago do suministro eléctrico este mes, en verbas de Intervención, algo que as socialistas califican de moi grave e pregúntanse que pasará en caso de que se produza unha  emerxencia social en Tomiño.

Esta crise afecta tamén á obra da futura biblioteca municipal, que neste momento está parada e non se descarta que a empresa adxudicataria renuncie a rematala.

O proxecto estrela do BNG na campaña electoral do 2007, e que foi presentado hai 5 anos,  que endebedou a Tomiño en 1 millón de euros máis e comprometeu fondos do programa reacpon da Deputación de Pontevedra, pode que quede nun esqueleto de puro formigón afondando no feísmo urbanístico, e o que é peor, a veciñanza sen ese esencial servizo.

Por todo isto as socialistas definen este último  mandato do bloque como a confirmación dun goberno esgotado e desgastado que tan só actúa por impulsos electoralistas e que levaron a Tomiño a unha situación económica realmente preocupante.