As socialistas de Tomiño presentaron o mes pasado enmendas ós orzamentos da Xunta de Galicia para o vindeiro ano 2023

Califican de maltrato para Tomiño, que cunha poboación de máis de 14.000 habitantes, teña unha consignación no mencionado orzamento de 0 euros.

Violeta de Santiago e Mirta Misa ante este maltrato da Xunta ao noso Concello, solicitan a través das enmendas que se invirta no colector xeral de Sobrada, unha obra imprescindible para poder acometer o saneamento da zona norte de Tomiño xa, pois os veciños e veciñas van moi fartos de tanto esperar.

Esixen que se finalice o proceso de concentración parcelaria que afecta a Estás-Figueiró-Goián dende hai máis de 25 anos. Califican de inconcebible que aínda siga sin pecharse este proceso no que todo é un absoluto despropósito, tanto na zona dos panascos cos títulos entregados como na zona de arriba que seguimos padecendo a espera da finalización. E agora, por si fóra pouco o que afecta ás veciñas e veciños, pretenden crear un polígono agroforestal. Un polígono do que descoñecemos quen o solicitou, como e a quen vai a beneficiar, a que vai a estar destinado nin cal será a afectación medioambiental.

As socialistas tamén presentaron enmenda para a ampliación do IES Antón Alonso Ríos, que aínda que parece inminente a súa execución, non aparece partida ningunha no documento oficial.

O polígono industrial e o remate da VAP tamén son esixencias que instan á Xunta a acometer, pois son demandas imprescindibles para o progreso de Tomiño.

A creación dun Centro de información á muller, o acondicionamento dos espazos comúns no Centro de Saúde coa construcción dun voadizo exterior para a recepción de doentes, o acondicionamento térmico do edificio da Galiña Azul de Goián, son, entre outras, demandas das socialistas.

" Non estamos a pedir luxos. Pedimos medidas e inversións concretas para o progreso da nosa terra. O orzamento medra un 8'5%, xestiona máis de 12.600 euros e o Concello de Tomiño recibe 0 euros. Absolutamente inasumible, manifesta a voceira Violeta de Santiago.