Camposancos, un entorno único e abandonado pola Xunta de Galicia

Durante os meses de verán, a Entidade Local Menor de Camposancos acolle a centos de turistas. A súa situación estratéxica na desembocadura do Miño fai de Camposancos un lugar moi visitado polo turismo, ademais de ser paso do Camiño Portugués pola Costa. Sen embargo, dende a Entidade Local Menor denuncian o incumprimento das obrigas de mantemento por parte da Xunta de Galicia e demanda unha senda peonil que permita que os desprazamentos a pé sexan seguros.

A estrada da circunvalación que conecta Camposancos coa Guarda resulta moi arriscada para os desprazamentos a pé. Os numerosos peóns que a utilizan teñen que camiñar pola calzada, posto que non hai sitio para eles ao non contar cunha senda peonil que asegure os seus desprazamentos de forma segura. A Xunta de Galicia non cumpre coas súas obrigas e a Entidade  Local Menor vese na obriga de desbrozar cos seus propios medios.

“Estamos moitas veces a saltar ao medio da maleza para esquivar os coches e en moitas ocasións teñen que parar os coches cando hai un viandante e se atopan dous vehículos de fronte. A falta dunha senda peonil que una Camposancos coa Guarda é unha demanda constante da veciñanza e dos que nos visitan” comenta a Presidenta da Entidade Local Menor, Mercedes Martínez.

Ante esta situación, a Entidade Local Menor amosa o seu descontento e insta unha vez máis á Xunta de Galicia a dar solucións, despois de reiteradas veces de solicitalo por escrito, telefónicamente e incluso facer manifestacións relevantes.