Comunicado ante as declaracións do PP sobre os danos producidos pola tubaxe que leva a auga ao Rosal e á Guarda

Ante as declaracións vertidas nos últimos días en diferentes medios de comunicación pola portavoz municipal do Partido Popular de Tomiño, o Concello de Tomiño quere aclarar o seguinte:

1. O pasado dia 14 de marzo a Corporación aprobou por unanimidade dos grupos municipais (BNG, PP e PSOE) unha moción para solicitar ao Consorcio de Augas do Louro que asuma o mantemento e conservación desta infraestrutura que leva auga de Tui ao Rosal e A Guarda. O Consorcio cobra aos concellos por este servizo.
2. Co seu voto favorable, o Partido Popular aprobou esixir ao Consorcio de Augas do Louro que realice os traballos de reparación necesarios para eliminar as fugas de auga na tubaxe de 14 quilómetros.
3. O Concello non pode realizar obras nunha estrada de titularidade autonómica. Contradicindo o que votou en pleno, o PP pide agora que o Concello asuma as reparacións nunha estrada responsabilidade da Xunta de Galicia.
4. O Concello avisou en reiteradas ocasións á Xunta dos problemas de seguridade viaria nestas estradas autonómicas. En resposta o servizo de mantemento de estradas da Xunta reparou a fuga localizada na parroquia de Figueiró, aínda que non a situada no Barro.
5. Desde o Concello de Tomiño laméntase que o Partido Popular estea desinformando deliberadamente á veciñanza, votando a favor destas cuestións en pleno e difundindo despois notas de prensa reclamando o contrario. Esta actitude demostra, unha vez máis, que o PP prioriza os intereses de partido aos de Tomiño.
6. Desde o Goberno municipal solicitamos ao PP que se posicione do lado de Tomiño e que non pretenda que se utilice o diñeiro dos impostos dos tomiñeses e tomiñesas para arranxar un problema que é responsabilidade da Xunta como titular da estrada e/ou do Consorcio de Augas do Louro.