Concerto de Santa Icía da Banda de Música do Rosal

"Finlandia", do compositor Jean Sibelius será a primeira das obras que escoitemos a continuación. Trátase dun poema sinfónico composto a principios do século XX como homenaxe do autor ao seu país natal. Dende os primeiros compases, escuros e turbulentos, ata o grandioso final, describe as tribulacións do pobo finés no seu paso da opresión rusa á autonomía e a liberación.

A continuación escoitaremos "Saga Cándida" do compositor belga Bert Appermont, que é unha selección a partir do musical do mesmo autor orixinal para banda ("Seed of Satan", ou "A semente de Satán"), no que se retrata unha caza de bruxas. A suite que interpretamos está estruturada en 7 movementos nos que se ilustran as distintas escenas do musical.

Continuaremos o noso programa cunha das grandes obras da literatura bandística: "Diversions", do compositor inglés Philip Sparke. Trátase dunhas variacións para banda de gran elaboración sobre un tema popular suízo, tema que escoitaremos interpretado polo saxofón alto case ao principio da obra, despois dunha maxestuosa introdución.

E para dar remate a este fantástico concerto anunciamos que contaremos coa presenza do noso amigo trompetista internacional Rubén Simeó, que interpretará como solista coa banda a "La Virgen de la Macarena" de Charles Kofe, ademáis de acompañarnos durante todo o concerto no escenario como un compañeiro máis.

Esta velada festiva terminará cunha cea-baile no Restaurante Juan na que participarán músicos, socios, familiares e simpatizantes da Agrupación Musical do Rosal.