CONSTERNACIÓN E TRISTEZA ANTE O FALECEMENTO DUNHA PERCEBEIRA NA COSTA DE OIA

O falecemento dunha percebeira mentras traballaba na costa de Oia crea consternación e tristeza entre a poboación e no gremio dos traballadores do mar. Compañeiros de traballo da falecida tentaron sen éxito sacala da auga, mentras agardaban a chegada dos efectivos de emerxencias, que segundo explicaron, "tardaron demasiado tempo en chegar".

Sobre ás 9:05 horas da mañá do Mércores día 12 de Decembro de 2012 dábase a voz de alarma á central do 112 de que unha percebeira duns 56 anos de idade caera ó mar tras recibir o impacto dunha onda do mar mentras faenaba na zona próxima a Punta Orelludas, no termo municipal de Oia.

Os efectivos de emerxencia desprazados ata o lugar, o salvamar Mirach, dúas patrulleiras da Garda Civil, o Helicoptero Pesca 1, Garda Civil, 061 e Protección Civil, non atoparon o corpo da falecida ata as 12:00h do mediodía, cando efectivos de Protección Civil descubrían o corpo nunhas rochas a uns 200m. ó sur do punto no que caíra ó mar. Tamén colaboraron nas tarefas de rescate varios pesqueiros que faenaban neses intres na zona próxima ó tráxico suceso.

Segúndo explicou o edil Alejandro Rodríguez en declaracións a Europa Press, a falecida, duns 56 anos de idade, era unha persoa moi querida no pobo e veciña de Viladesuso dende fai 30 anos.