Continúa a Programación Cultural das Festas do Alivio 2016 en Tomiño

O Concello de Tomiño pon en marcha entre os días 5 e 12 de setembro unha ampla programación de actividades enmarcadas nas Festas do Alivio 2016.

Tomiño celebra dende o luns 5 e até o vindeiro luns as festas patronais da Virxe do Alivio. A Concellalía de Cultura, que dirige Cristina Martínez, organiza un programa de actos e actividades que comeza esta noite ás 21.00 horas coa proxección de cine familiar Jurassic World, na Praza do Seixo.

O martes haberá para os máis peques, inchables e o espectáculo Caixiña de Mistos.

O mércores 7 presentación do disco "Olvidáchesme por pobre" a cargo de Fradi Són e, o xoves 8 actuación da banda de música de San Vicente de Barrantes.

O domingo 11 de setembro celebrarase ás 11 da mañá a 10ª edición do Acto Cívico do Alivio, na que o Concello homenaxeará, como o vén facendo habitualmente, a un tomiñés distinguido. Este ano adicado a Daniel Pino Vicente, sociólogo e urbanista, natural da parroquia de Forcadela , fundador da empresa Consultora Galega e director do IGVS durante o goberno do bipartito na Xunta de Galicia. O Concello quere recoñecer con este acto cívico a traxectoria de Daniel Pino especialmente no eido do urbanismo, salientando o seu gran coñecemento da xeografía rural e urbana, unha das súas paixóns.

Por último, até o luns 12 estará aberta no Mercado Municipal a exposición colectiva organizada pola Concellalía de Cultura, como cada ano.