Costura, creatividade e sostibilidade para pechar os obradoiros de primavera no Rosal

A creatividade e a sostibilidade protagonizan o peche da edición de primavera dos obradoiros organizados polo Concello do Rosal. A actividade final consistirá nun taller práctico de iniciación á costura que se celebrará o sábado 21 de xuño ás 10:00 h na nave do Obradoiro da Mata, e será impartido por Vicky, responsable de Confecciona Academia.

Durante tres horas, as persoas participantes aprenderán a confeccionar unha bolsa tote bag a partir dun pantalón vaqueiro usado, combinando aprendizaxe, reciclaxe e creatividade. A proposta está aberta a todas as idades e non require experiencia previa, o que a converte nunha actividade accesible tanto para quen desexe iniciarse no mundo da costura como para quen queira explorar unha nova forma de reutilizar prendas en desuso.

Segundo destacou o concelleiro de Xuventude, Alejandro González, “as actividades creativas como esta non son só espazos de aprendizaxe, son lugares de encontro, de economía circular e mesmo de autocoidado”. González subliñou ademais o compromiso do Concello coa sostibilidade, a reutilización de materiais e a formación práctica para todas as idades.

Para participar, as persoas interesadas deberán levar dous pantalóns vaqueiros usados, fío de coser para máquina ao seu gusto e a súa propia máquina de coser. O resto de materiais —como agullas, tiza para teas, alfinetes, tesoiras, cinta métrica e outros utensilios— serán facilitados pola organización.

O taller terá un custo de 16 euros e está limitado a 8 prazas, cunha prioridade de inscrición para persoas menores de 30 anos. A inscrición debe formalizarse a través do formulario habilitado polo Concello.