ESGOTADAS AS ENTRADAS PARA O CONCERTO ACÚSTICO DE SES DESTE VENRES NA GUARDA

A cantante SÉS, actuará en formato acústico o sábado 15 de novembro ás 20:30 horas no Centro Cultural da Guarda. O concerto, de balde,(ata completar aforo) está organizado polo Centro de Información á Muller, enmarcado dentro do programa de Promoción da Igualdade entre mulleres e homes e subvencionado pola Secretaría Xeral da Igualdade e o Fondo social Europeo.

DEBIDO A GRAN ACEPTACIÓN E ACOLLIDA DO CONCERTO DE SÉS, O CENTRO DE INFORMACIÓN Á MULLER(CIM) DA GUARDA COMUNICA QUE SE ESGOTARON AS ENTRADAS

DAMOS AS GRACIAS POLO INTERESE AMOSADO E AGARDAMOS QUE O ÉXITO DA CONVOCATORIA SE TRASLADE AO ÉXITO DO PROPIO CONCERTO.
Logo do éxito dos seus traballos ‘Admirando a condición' (2011) e ‘Co xenio destrozado' (2013), a cantante Sés achégase á Guarda o vindeiro sábado, 15 de novembro, para pór a voz e o espectáculo --ao ritmo da guitarra de Tito Calviño--, nun concerto acústico. Así, tras a exitosa xeira de actuacións por todo o país, chega a ocasión de gozar dun xeito máis íntimo do enorme carisma e da forza persoal da artista coruñesa, sempre aberta a conquistar á audiencia co seu caudal de enerxía reivindicativa, con perspectiva feminina, galega e en galego.
Desde o CIM da Guarda explican que o carácter da cantante, o seu papel comunicativo e a defensa que fai dos valores femininos dende unha posición honesta, fresca e chea de vitalidade -mais tamén directa e visceral--, axudan a nos facer comprender tanto a discriminación de xénero como a visibilización da igualdade que ten que imperar na relación entre as persoas, polo que recomendan o concerto como unha actividade imprescindible. A linguaxe fresca, fluída, directa e mesmo irreverente que emprega a cantante nas súas letras e nas súas intervencións entre canción e canción, axudan a conectar de xeito doado co público, xerando un vencello que posibilita que a transmisión dos valores da igualdade entre mulleres e homes teñan máis éxito que nun obradoiro ao uso.