ESPECIAL - A GUARDA CONTA XA CO PLAN DIRECTOR DA PENÍNSULA DO MONTE SANTA TREGA

A Consellería de Cultura, Educación e Ordenación Universitaria presentou hoxe á corporación municipal e aos veciños da Guarda o Plan Director da Península do Monte de Santa Trega, un documento que servirá para coñecer o estado deste xacemento arqueolóxico, establecer as condicións de conservación e fixar unhas directrices de ordenación e usos deste espazo histórico. Neste acto participaron o director xeral do Patrimonio Cultural, José Manuel Rey Pichel, e o coordinador do equipo redactor, Mario Crecente.

A Xunta de Galicia encargara, por medio dun concurso público, a redacción deste Plan Director co obxectivo de coñecer as ferramentas de xestión adecuadas e as propostas de actuación pertinentes para acadar a conservación dun grande parque cultural baseado no xacemento arqueolóxico e de todos os seus elementos patrimoniais, paisaxísticos e culturais. Todo este traballo foi realizado por un equipo multidisciplinar, dirixido polo arquitecto Mario Crecente e formado por máis de vinte profesionais, científicos e profesores de ampla experiencia.

O director xeral do Patrimonio Cultural asegurou que, tras a redacción e aprobación deste documento, “ponse ao servizo de todas as administracións, axentes e propietarios, unha ferramenta técnica imprescindible para desenvolver, de forma coherente, planificada e axeitada aos valores culturais, as actuacións que permitan o desenvolvemento sustentable deste lugar único, o monte de Santa Trega”.

Rey Pichel explicou que “este caderno de ruta vai ser referencia tanto para os proxectos de actuación, de dinamización e de posta en valor que se desenvolvan no futuro, como para os documentos urbanísticos, de ordenación do territorio e mesmo de protección do patrimonio cultural que se poidan tramitar”.

Apartados do Plan

O Plan Director para o Monte Trega, que xa está aprobado pola Dirección Xeral, estrutúrase en tres apartados principais: coñecemento, diagnose e intervención. O Plan director aborda, en  primeiro lugar, a análise e descrición pormenorizada do lugar, dos seus valores culturais, recursos e elementos e axentes discordantes e dos fondos documentais, cunha visión integradora dese corpo documental que pode ser destinado ás funcións de protección, divulgación e concienciación.

En segundo lugar, realizouse unha diagnose do estado de conservación atendendo aos impactos e as interferencias que o deturpan non só no eido cultural senón á escala da paisaxe, do territorio e do desenvolvemento social, económico e turístico. Analizáronse tamén as cuestións relacionadas coa xestión do recurso e a súa potenciación e desenvolvemento por medio do seu manexo acaído e sostible.

Por último, propóñense diferentes intervencións que se organizan por ámbitos, necesidades e urxencia, así como por áreas de investigación e áreas de coñecemento e xestión (urbanística, medioambiental, patrimonial etc). Con esa finalidade desenvólvense as distintas propostas construtivas e arquitectónicas nun nivel de anteproxecto e preséntanse as ferramentas xurídicas e administrativas axeitadas para levalas adiante.

Intervencións

O Plan Director complétase cun estudo de xestión, que inclúe propostas de actuación con especial atención á posta en valor do Monte Trega, á conservación do seu patrimonio cultural e á potenciación da paisaxe e dos recursos turísticos e culturais como motor de desenvolvemento social e económico. Este documento-guía desenvolve, con diferentes niveis de profundidade, unhas trinta intervencións a realizar en varias anualidades. Estas actuacións poderán ser promovidas e financiadas por distintas institucións, de forma illada ou conxuntamente.  

A Consellería de Cultura e Educación, que xa destinou 208.000 euros para a redacción deste Plan Director, ten previsto realizar diferentes traballos de conservación, consolidación e de investigación do conxunto de arqueolóxico de Santa Trega, tendo sempre en conta as dispoñibilidades orzamentarias.

FOTOGRAFÍAS

 

VIDEOS