ESPECIAL - A SALA DE EXPOSICIÓNS DE TUI ACOLLE UNHA MOSTRA DE PINTURAS DA TUDENSE ROSA Mª VILA IGLESIAS

Dende onte se pode visitar na Sala anexa de Exposicións da Área Panorámica de Tui unha mostra de pinturas da tudense Rosa Mª Vila Iglesias que recolle algunhas das súas obras realizadas dende o ano 1998, cando realizaba a súa primeira exposición na Sala Arzobispo Lago de Tui.

Esta Exposición recolle diferentes técnicas coma a plumilla ou o óleo con temática de natureza, arquitectura e retrato, entre outras.

Segundo nos comentou Rosa Mª, leva realizando pinturas dende a década dos 90´s, cando atopou nos lienzos unha vocación que a levou a realizar a súa primeira exposición na cal tivo un gran éxito, coa venda da totalidade das obras expostas, e mesmo ten levado a cabo obradoiros e clases de pintura a petición de particulares que quedaron abraiados pola calidade técnica das súas obras.

"No ano 1998 comezou a miña andaina artística realizando a primeira exposición na cidade na que nacín, Tui. Despois consecutivamente fun realizando exposicións por diversas salas ao longo das diferentes comarcas e norte portugués.

O meu traballo artístico está ligado ao debuxo en tinta, plasmando todos aqueles recunchos polos cales discorre a miña vida cotiá, debuxando sempre de forma realista.

Co paso do tempo a miña inquietude fixo que me atraesen outras técnicas como o óleo, a acuarela, o pastel ou o grafito mesturándoas e evolucionando pero sen deixar de manter ese romanticismo característico dos primeiros traballos.

Debuxo e pinto intentando captar todo ese realismo sempre interpretado".

Con esta nova mostra a Sala Municipal de Exposicións segue consolidándose como un espazo dedicada a difusión e promoción dos artistas locais que atopan nestas instalación un lugar para a exhibición da súa producción.

FOTOGRAFÍAS

(Fai clic na fotografía para acceder á galería de imaxes)