ESPECIAL - AS REDEIRAS DE A GUARDA DIVERSIFICAN A SÚA ACTIVIDADE COMPLEMENTANDO O SEU TRABALLO COA ARTESANÍA

Obxectivo do proxecto
A iniciativa ten por obxecto divulgar a actividade das redeiras a través da venda de produtos de artesanía. Ademais, tamén busca capacitar ao colectivo nas tarefas relacionadas coa artesanía, a través dunha formación práctica específica para o deseño de produtos artesanais coa colaboración de profesionais do deseño. Así acádase a diversificación do traballo das redeiras, de xeito que poderían obter ingresos económicos complementarios que permitirán unha mellora na súa calidade de vida.

O desenvolvemento do proxecto realizarase a través de diferentes actividades como son os obradoiros divulgativos, onde as redeiras amosarán os seu traballo coas diferentes artes e aparellos; a realización dunha xornada sobre o traballo deste colectivo; a formación en fabricación de produtos artesanais –como bolsos ou bufandas- e a formación e promoción nas redes sociais. A iniciativa tamén contempla a elaboración de material divulgativo sobre a actividade das redeiras e da pesca na Guarda así como instalar un expositor para promocionar os produtos artesanais feitos por estas profesionais.

O proxecto supón un orzamento total de máis de 2.000 euros, dos que a Consellería do Medio Rural e do Mar subvenciona, a través do eixo 4 do Fondo Europeo da Pesca, o 80%.

Novo punto de venda de Artesanía de Galicia
Con motivo da presentación deste proxecto, a Fundación Centro Galego da Artesanía e do Deseño” da Consellería de Economía e Industria abriu ao público un novo punto de promoción e venda de Artesanía de Galicia, que acollerá as novas creacións deste colectivo e outros produtos de 10 obradoiros artesáns inscritos no Rexistro Xeral de Artesanía da Xunta de Galicia. Esta nova apertura enmárcase na estratexia da Xunta para que a marca Artesanía de Galicia, presente xa en numerosos establecementos comerciais, conte con espazos propios en exclusiva en contornas singulares e de especial atracción de visitantes, contribuíndo, polo tanto, á mellora da comercialización e á promoción do produto artesanal galego.

Neste labor, as Consellerías de Economía e Industria e do Medio Rural e do Mar, puxeron en marcha no ano 2012 o proxecto “Enredadas. Cultura e oficio das Redeiras”. Esta iniciativa enmárcase na estratexia de impulso ao sector artesán galego e á recuperación dos oficios tradicionais. O obxectivo principal é amosar o traballo, a tradición e o oficio das redeiras artesás, iniciando ademais actividades de diversificación económica dirixidas a produtos de artesanía.

No 2012 leváronse a cabo cinco cursos de formación especializada para a creación de novos produtos que poidan contribuír a unha mellora económica e posta en valor do seu traballo.

FOTOGRAFÍAS