ESPECIAL - Dani Delacámara puxo a nota de humor ó primeiro día da Festa da Langosta e da Cociña Mariñeira de A Guarda

Este ano o elixido para dar o pistoletazo de saída á XXVI Festa da Langosta e da Cociña Mariñeira foi o coñecido humorista Dani Delacámara, encargado de por a nota de humor ó primeiro día deste evento gastronómico. O guionista e cómico é un dos humoristas máis prestixiosos de España e rostro habitual de El Club de la Comedia e Comedy Central, ademais de ter sido recoñecido polos seus monólogos e imitacións coa Antena de Oro e o Micrófono de Oro.

A lectura do pregón tivo lugar o venres 1 de xullo na Praza do Reló, previa actuación da Agrupación Musical da Guarda. O alcalde da Guarda, Antonio Lomba Baz, abríu o acto para presentar esta nova edición da Festa da Langosta e da Cociña Mariñeira e dar paso ao citado pregoeiro, non sen antes de entregarlle un pin conmemorativo.

Unha vez rematado o pregón os asistentes dirixíronse ó Porto da Guarda para así proceder á apertura da carpa da XXVI Festa da Langosta e da Cociña Mariñeira. Ás 22,30 horas Dani Delacámara subíu ó escenario da carpa dende onde ofreceu o seu recoñecido monólogo "Humor en defensa propia". Este primeiro día de festa pechouse coa actuación da orquestra FUTURO.

Durante esta fin de semana

Sábado día 2: Travesía a Nado
O deporte tamén ten a súa cita na festa gastronómica coa XXI edición da Travesía a Nado Porto da Guarda, que dará comezo ás 12 horas. Na carpa a festa estará ambientada coa a actuación do grupo de pop-rock local 2MIS ás 12:30 horas. Xa pola tarde, despois de degustar as delicias da cociña mariñeira guardesa, o programa da TVG "Aquí Galicia" emitirá en directo dende o Porto da Guarda, nun programa que contará coa participación dos nosos veciños e veciñas da Guarda e con diversas actuacións musicais e entrevistas. Pola noite haberá actuacións de grupos de música tradicional no "serán mariñeiro".

Domingo 3 de xullo: Espectáculos e actuacións para toda a familia
Nesta xornada a música local volverá á carpa antes do xantar con SONGODIN'S, ás 12,30 horas no Porto da Guarda. A tarde está reservada para os nenos, nenas e familias onde desfrutarán do espectáculo musical infantil de "Uxía Lambona e a Banda Molona" ás 19 horas, que fará as delicias dos máis novos. O broche final virá coa "Noite de Fado", que xa é habitual na programación da Festa. Nesta edición a protagonista será a artista portuguesa Marla Amastor, aclamada cantante de fados, letrista e compositora do país veciño.

Pero isto non é todo, e durante toda a fin de semana todos os que se acheguen á Guarda poderán visitar a recoñecida Feira de Artesanía. Ademais, como ven ocorrendo durante edicións anteriores, o Tren turístico que percorrerá as rúas da Guarda. Aqueles que nos visiten poderán coñecer mellor o noso concello coas visitas guiadas ao Museo do Mar, o Castelo de Santa Cruz e o Monte Santa Trega dentro da Rede de Museos. A isto hai que engadirlle as diversas iniciativas culturais, entre as que destaca "O muro da arte", que invita a artistas a embelecer as rúas coas súas obras e a exposición anual ofrecida pola Asociación pola Recuperación do Traxe Galego, na Casa dos Alonsos, que se poderá visitar durante a fin de semana de 19 a 22 horas. Durante as mañás o grupo local "A Boalleira" anunciará as festas a veciños e veciñas e visitantes co pasarrúas.

Un ano máis a Guarda convertese no punto gastronómico de referencia da comarca do Baixo Miño coa XXVI Festa da Langosta e da cociña mariñeira na que todos poderemos degustar a langosta e a cociña mariñeira e desfrutar dunha fin de semana chea de gastronomía e actividades nunha cita imprescindible na Guarda os días 1, 2 e 3 de xullo.