ESPECIAL - MANIFESTACIÓN NA GUARDA CONTRA OS DESPIDOS NO SAN XEROME

O pasado Mércores día 24 de Abril de 2013 tiña lugar unha manifestación na Guarda convocada por CIG-Ensino en contra do despedimento de 4 traballadores do Centro San Xerome, algún dos cales levaba traballando 31 anos no mesmo.

Máis dun cento de persoas congregáronse as portas do San Xerome na Rúa Galicia de A Guarda para dende alí realizar unha manifestación que percorreu a rúa Vicente Sobrino ata a Praza do Concello, onde o Secretario nacional da CIG-Ensino, Sr. Anxo Louzao, deu lectura a un comunicado.

Dende CIG-Ensino se denuncia que o Centro de atención a discapacitados San xerome Emiliani de A Guarda está a practicar a represión sindical contra os traballadores que reclaman o mantemento dos seus dereitos. As persoas despedidas son unha coidadora e tres monitores que desenvolven o seu traballo no sector asistencial, enmarcados nun convenio que se caracteriza por retroceder en materia de dereitos laborais. A reclamación do cumprimento do convenio e da lexislación vixente comeza no San Xerome no ano 2008, cando rematando o curso escolar, a Xunta Directiva trasládalle ós traballadores que lles vai incrementar a xornada laboral, acadándose un acordo a posteriori que, trala adopción do mesmo por parte dos traballadores, a Xunta Directiva do San Xerome negouse a asinar. Tras tres anos e varias sentenzas, a CIG-Ensino recibe sentenza favorable que definitivamente pecha o conflicto e en Xullo de 2011 o TSXG falla a favor dos traballadores, establecento que non pode haber modificación da xornada se on hai acordo entre as partes, obrigando a repor a todos os traballadores afectados a xornada laboral que viñan realizando ata xullo de 2008.

O pasado 5 de Abril de 2013 o Centro San Xerome despide a 4 traballadores dos 9 que promoveron o conflicto colectivo no seu día alegando motivos económicos. Dende a CIG-Ensino se esixe a readmisión inmediata dos traballadores emprendendo as accións legais oportunas a través da súa asesoría xurídica.

Dende o Centro San Xerome manifestaron a través dun comunicado de prensa o pasado 9 de Abril que  "A Asociación S. Xerome Emiliani é unha entidade sen ánimo de lucro que ten por misión "facilitar ás persoas con discapacidade intelectual e ás súas familias apoios e servizos profesionalizados para mellorar a súa calidade de vida, intervindo no ámbito persoal, educativo, familiar,laboral e social". Como non pode ser de outra maneira, todos nosos recursos están volcados en actividades que axuden o desenvolvemento desta misión.
Nos últimos anos os ingresos foron disminuindo, mentras que os gastos aumentaron, e o resultado foi de perdas económicas, o que unido á falta de financiación das entidades bancarias situaron á Asociación nunha situación difícil, sen liquidez para afrontar todos os gastos necesarios para manter a nosa actividade coa mesma estructura.
Pese aos esforzos por manter as cousas como estaban, a nova reglamentación en materia de bonificacions á S. social, que supuxo un maior coste para a Asociación ( 12.000.- € ano), así como o incremento das demais partidas de gastos sociais e xerais, obligounos a tomar medidas conducentes a manter o equilibrio presupuestario, senon , de continuar igual, pondría en perigo a continuidade do noso proxecto social.
Intentáronse levar a cabo outras medidas menos drásticas dende o punto de vista social, pero lamentablemente non se alcanzou o consenso necesario coa parte social.
A nova estructura permitirá continuar coa obra social e a maioría das actividades desenvoltas no noso centro, adaptando as mesmas aos ingresos reais que hoxe en día ten a nosa Asociación.
Con respecto aos traballadores afectados pola rescisión dos seus contratos, tívose en conta criterios obxectivos para sua elección, entre os que cabe destacar, a productividade, polivalencia e coste hora profesional en función da xornada anual realizada por cada un dos compoñentes da plantilla.
As rescisions contractuais foron realizadas por causas obxectivas económicas e organizativas, con dereito a percibir unha indemnización de 20 días por ano de servizo co límite de 12 mensualidades.

O fin de esta medida é preservar no posible os demais postos de traballo e a continuidade do noso proxecto social."

FOTOGRAFÍAS

Fai clic sobre as imaxes para acceder á galería