Especial - O Peixe Espada foi o anfitrión dunha fin semana gastronómica na Guarda

O alcalde do Concello da Guarda, Antonio Lomba, foi o encargado de dar a benvida ó acto de inauguración, dedicando un merecido recoñecemento á labor realizada polos organizadores, grazas aos cales esta décimo cuarta edición da festa gastronómica é posible.

Un pregón de campionas
O equipo guardés, que ven de firmar un acordo de patrocinio con ORPAGU, aproveitou a ocasión para amosar o seu novo equipamento, no que se inclue o logotipo coa silueta do peixe espada, representativo da organización. Xa lucindo a nova camiseta, a capitana do Atlético Guardés, Estela Doiro, tomou a palabra agradecendo o apoio tanto dos afeccionados como dos patrocinadores, para pasar a eloxiar as virtudes nutricionais do peixe protagonista da festa e animar á inclusión deste alimento nas nosas dietas.

Tras o pregón, a xerente da Organización de Palangreiros Guardeses, Juana Parada, fixo entrega dos premios ás gañadoras do II Concurso de Relatos "Homes de Mulleres do mar", para a mosense de 12 anos, María Calvar; e o Concurso de Carteis "Festa do Peixe Espada", que foi para Mikaela Rodríguez, de 10 anos de idade e alumna do Colexio Padres Somascos da Guarda. A organización tamén quixo agasallar, facendo entrega dunha figura conmemorativa da festa elaborada polos alumnos co Centro San Xerome Emiliani, ás pregoeiras do Atlético Guardés e ó Concello da Guarda, como agradecemento a súa colaboración.

Programación deportiva e lúdica
O acto rematou coa presentación do II Campionato Galego Inclusivo de Náutico Adaptado, organizado polo Clube Náutico Sen Amarras, que se celebrou na mañá do sábado no porto da Guarda. A charanga Cantos Somos animou aos primeiros comensais da festa, para dar paso ó concertos "Tributos Pop&Rock" ofrecido pola Agrupación Musical da Guarda, pasadas as 22.00 horas, no exterior da carpa.

A entrega dos premios da competición celebrouse na tarde do venres,  na carpa do porto, tras as actuacións do Coro Fuscalheiro e o Grupo de Acordeóns Mascarelhas. Este último volveu a amenizar esta xornada gastronómica tras a entrega dos premios e xa pola noite a música tradicional cedeu o espazo á electrónica, da man do DJ Diego Wass.

Na xornada do domingo as actuacións musicais comezaron co Grupo de baile e gaitas Do Lusco ó Fusco seguido da música tradicional galega a cargo do grupo de gaitas A Boalleira.

Amais destas, a festa contou cun mercado artesanal e outras actividades dirixidas aos máis pequenos, como inchables, pintacaras e obradoiros. O domingo engadíuse as actividades acuáticas organizadas polo Clube Alagua, que ofertou clases de vela para os cativos.

Variada oferta gastronómica e lúdica
Os establecementos hosteleiros participantes nesta XIV edición da festa (Xantar, Cangrexal, O Roxo e Xeito) ofertaron un total de 16 preparacións distintas do peixe espada, entre pratos e tapas cuxos prezos non superan os 8 euros. Así, os visitantes puideron degustar  o tradicional prato de espada á prancha con cachelos ou noutras variedades como guisado, en salpicón, en empanada ou empanadillas, croquetas, en zorza, en tostas, en escabeche, ao peregrino; fideuá, tortilla ou quiche con peixe espada, e bocadiños de espada con salsa alioli. A oferta gastronómica completouse cos postres da Confitería Estévez e o posto de productos gourmet en conserva de ORPAGU.