ESPECIAL - O ROSAL CELEBROU CORRELINGUA 2013 CON MÁIS DE 1500 RAPACES

Correlingua é a denominación que adoptaron de maneira común as diversas carreiras en prol do idioma que se convocan no país. É unha proposta de carácter lúdico-educativo que pretende convidar a mocidade e os centros de ensino a participar nun acto público de reivindicación do dereito a medrar en galego e tamén a exercer de maneira efectiva como galegos e galegas a través do uso do noso idioma, única forma de garantir o seu futuro. As actividades teñen como lugar de celebración 12 comarcas galegas e comezaron o día 2 de maio en Ourense.

O Correlingua está organizado pola Asociación Socio-Pedagóxica Galega, AS-PG, a Confederación Intersindical Galega - Ensino, CIG-Ensino, a Mesa pola Normalización Lingüística, os Concellos de Lugo, Pontevedra, Ourense, Vigo e a Deputación de Lugo. No Baixo Miño contamos coa colaboración do Concello do Rosal e tamén dos Concellos de Tomiño e Salceda de Caselas.

Desenvolvemento do Correlingua:

No Rosal, o alumnado chegou as 11 da mañá para iniciar a carreira desde o CPI Suárez Marquier, percorrendo as rúas até a Praza do Calvario, na que baixo a carpa instalada se puido gozar da festa coa actuación de Pepe Penabade e de Lidia Botana. Ademais houbo concurso de pancartas e actuou a Banda Infantil do Rosal e un grupo de alumnas do IES de Salvaterra.

Centros participantes:

Na actividade contouse coa participación do CEIP de Atios, O Porriño, CEIP As Solanas e CEIP Rodríguez Sinde da Guarda, IES de Salvaterra, CEIP de Rebordáns, CEIP de Randufe, IES San Paio, IES Indalecio Pérez Tizón e CEIP Nº 1 de Tui e CPI Suárez Marquier do Rosal.