ESPECIAL - PORTOS DE GALICIA INVISTE MÁIS DE 43.000 EUROS EN MELLORAS INFRAESTRUTURAIS PARA O SECTOR PROFESIONAL DA GUARDA

Portos vén de rematar o peche da zona de varada, uns traballo solicitados pola confraría e que supoñen a instalación dun perímetro pechado dende o edificio da lonxa ata o espigón. Así mesmo, o ente público deu remate ao peche dos laterais da marquesiña utilizada polos percebeiros para a clasificación do producto.

Igualmente, estanse a tramitar outras dúas actuacións para o sector profesional. Así, instalarase un motor para a apertura da porta corredera do peche do varadero, que mellorará o acceso, tal como solicitou a confraría. Finalmente, instalaranse tamén pantallas de iluminación na marquesiña dos percebeiros. En total o investimento das catro obras é de 43.600 euros.

A estes traballos súmase a recente habilitación dun heliporto de emerxencias diurnas no peirao. Na súa aposta pola seguridade das zonas marítimas e a prestación de servizos auxiliares aos usuarios dos portos galegos e aos cidadáns das vilas marítimas, Portos de Galicia, ten xa operativa a primeira fase dunha rede de heliportos de emerxencias diurnas en puntos estratéxicos da costa. En días pasados entrou en funcionamento o da Guarda.

Estas instalacións conforman unha rede ao longo de toda a costa galega que permite reducir as actuais sombras de cobertura da navegación aérea, producidas pola falta de infraestruturas, a través da creación de bases supletorias para os helicópteros dentro das zonas portuarias. Aproveitando a superficie dos peiraos seleccionados, delimítase unha zona para despegue e aterraxe destes aparatos, que permite reforzar o servizo nas zonas costeiras de relevancia destacada.

A día de hoxe, os peiraos nos que xa están operativos os heliportos son os de Corme, Cedeira, Sada, Laxe, Camariñas, Ribeira, Cabo de Cruz (Boiro), Tragove (Cambados), O Grove e A Guarda. Estas localidades pasan así a ter unha pequena base aérea de emerxencias diurnas que permite a execución de maniobras ou repostaxe a helicópteros que ata agora tiñan limitado o seu funcionamento polo mapa de bases existentes, agora incrementado.

FOTOGRAFÍAS

VIDEOS