ESPECIAL - TOMIÑO ACOLLERÁ O 17 E 18 DE NOVEMBRO A I MOSTRA DE BIOMASA

A mostra, que se celebrará no Pavillón Polideportivo de Goián, foi presentada esta mañá en rolda de prensa no Concello de Tomiño, coa presenza de Julio Ruiz, director técnico da AFG; Jesús Rodríguez, representante de Enerxil, e a alcaldesa da vila, Sandra González. O primeiro explicou que o obxectivo principal da feria é a promoción do uso da biomasa forestal para fins enerxéticos e térmicos en Galicia e Norte de Portugal. "A intención é unir os eslabóns da cadena, desde produtores ata consumidores, pasando por empresas de enerxía, instaladoras, etc. para que se integren e se animen a utilizar este sistema de aproveitamento enerxético", precisou.

A feria terá, por unha parte, un espazo para stands e atención ao público, con representación de empresas do sector forestal, viveiros, etc., nos que haberá técnicos especializados que tentarán despexar as dudas dos posibles usuarios, sobre aspectos relacionados coa instalación e consumo. Por outra banda, organizarase unha xornada divulgativa, durante a mañá do sábado 17.

Jesús Rodríguez, de Enerxil, salientou a importancia de que desde as comunidades de montes se fomente unha explotación sostible dos mesmos, pondo en valor os inmensos recursos forestais galegos para un mellor aproveitamento enerxético baseado na biomasa, referíndose tamén aos efectos beneficiosos que tería para os montes galegos a utilización da biomasa, en especial, na limpeza e ordenación dos montes e por conseguinte, na loita contra incendios.

A alcaldesa de Tomiño, pola súa banda, salientou as posibilidades da biomasa forestal coma un recurso xerador de riqueza, emprego e dinamización económica de caracter sostible. Ao mesmo tempo, destacou o aforro significativo que o uso deste tipo de enerxía podería significar para os particulares.
Lembrou nesta liña a existencia dunha empresa local adicada á biomasa que está funcionando ben.

Xornadas técnicas
Abrirá o ciclo de conferencias Francisco de Ana Magán, presidente da AFG, coa ponencia "O monte e a biomasa forestal" (10.45 hs). Seguidamente, a partir das 11.15 hs., Diego Fernández Suárez, enxeñeiro de Minas e experto en instalacións de biomasa térmica, falará de "Equipamentos enerxéticos alimentados con biomasa forestal". Seguidamente, José Otero abordará os proxectos para núcleos de poboación e edificacións públicas e privadas, e Alejandro Martínez que falará sobre "Arquitectura bioclimática".
Logo dunha pausa, Nicolás Vázquez, Xefe de Área de Enerxías Renovables do INEGA, dará información sobre axudas públicas para equipamentos e caldeiras de biomasa.

FOTOGRAFÍAS