ESPECIAL - TUI ACOLLERÁ ESTE VENRES UNHA DOBRE SESIÓN DA OBRA -DÍAS SEN GLORIA- NA QUE ACTÚA MANUEL MANQUIÑA

O pasado Mércores día 8 de Maio tivo lugar no hall do Teatro Municipal da Área Panorámica de Tui a presentación da obra de Roberto Vidal Bolaño "Días sen gloria" coa dirección escénica de Fefa Noia e producción do Centro Dramático Galego.

Nesta presentación estiveron presentes a Concelleira de Cultura, Sra. Vanesa Rodríguez, o Director do Centro Dramático Galego, Sr. Manuel Guede, o Alcalde de Tui, Sr. Moisés Rodríguez e o actor Manuel Manquiña.

Trátase do 5º espectáculo da programación da Axenda Cultural do Concello de Tui 2013 que conta coa colaboración do Centro Dramático Galego. O teatro municipal da área panorámica de Tui ten acadado nesta programación unha media de 290 espectadores por función, o que para a Concelleira de Cultura confirma a aposta cultural do municipio e a complicidade dos ciudadanos tudenses coa programación cultural.

Para o director do Centro Dramático Galego é un placer poder contar con esta representación teatral na vila tudense, favorecendo a condición de vila fronteiriza co mesmo carácter desta obra que se representará en dobre sesión o Venres 10 de Maio contando cunha proposta escénica de alta calidade cun reparto extraordinario encabezado polo actor Manuel Manquiña na súa faceta dramática.

Esta é a primeira vez que o Centro Dramático Galego adica toda unha tempada a un autor en particular como é Roberto Vidal Bolaño, homenaxeado nas Letras Galegas 2013.

Para o actor Manuel Manquiña, dende que lle propuxeron a representación desta obra, a aceptou con gran respeito hacia a figura e obra do seu autor, considerando coma un dos seus mellores papeis, con certa complexidade, e convencido de que o público tudense quedará moi satisfeitocoa mesma.

O alcalde de Tui amosou a súa satisfacción coa visita desta obra á cidade de Tui, destacando o compromiso do Centro Dramático Galego, ofertando obras de gran calidade e da nosa terra. Tamén despertou o interese do rexedor tudense poder ver a Manquiña noutro rol diferente ó que estamos acostumados a velo, convencido de que o fiel público do teatro municipal agradecerá esta posta en escea.

Entre o elenco de actores desta representación teatral atópanse Borja Fernández, Manuel Manquiña, Felisa Segade, Eva Souto e Sergio Zearreta.

Días sen gloria ten a súa base noutra producción bolañesa titulada "Xubileu", estreada en 1982 pola compañía Troula baixo a dirección de Antonio Simón. O texto foi levemente modificado para presentalo en 1992 ao Premio Rafael Dieste, que acabou por recibir.

A historia desta obra está disposta de xeito fragmentario, en 37 cadros ou escenas breves, que transcorre nun lapso de tempo de 30 días polo Camiño de Santiago. Conta a viaxe dun home e unha muller, personaxes sen nome, peregrinos a Compostela por razóns moi distintas, nun mundo de prostitutas, cabaleiros, soldados, esmoleiros, falsos predicadores, santos e demonios...

Días sen gloria retoma o vello mito do amor e da morte, nun camiño de violencia e sexo, no que, por encima de todo, triunfa a solidariedade, a amizade e o amor.

O Venres 10 de Maio realizaráse unha sesión escolar na que participarán arredor de  320 alumnos de Tui e Tomiño e ás 21:30h da noite realizaráse unha sesión que ten un custe de 5€ e 7€.

CDG con “Días sen gloria”

Data:  Venres, 10 de maio, ás 21.30h

Lugar: Teatro Municipal

FOTOGRAFÍAS

 (Fai clic na imaxe para acceder á galería)