Esperanza Mara actuará na Igrexa de San Vicente de Barrantes dentro do ciclo -Música e Románico-

O vindeiro venres, 15 de xullo, terá lugar, ás 21:00h, a actuación da soprano Esperanza Mara na igrexa románica de San Vicente de Barrantes (Tomiño). O evento, que será accesible para todos os públicos de xeito gratuíto, achegará unha proposta musical baseada nas cantigas medievais e prerrenacentistas, nas que se pretende poñer en valor a figura da muller na música da Idade Media.

Música e Románico

Cada concerto do ciclo 'Música e Románico', sendo este o segundo, comprende dúas partes que se conxugan coma un todo. Na parte didáctica da actividade lévase a cabo unha introdución sobre o patrimonio arquitectónico (neste caso, a cargo de Sara Quintana, licenciada en Historia da Arte), propoñendo en todo momento un modelo de participación activo. Na parte lúdica da actividade, o público asiste á interpretación de diferentes pezas a través da voz e do auto-acompañamento instrumental.

Ademais, os instrumentos empregados durante os concertos son reproducións de instrumentos reais da época, como a arpa ou a viola. Tamén as pezas escollidas para o repertorio forman parte da lírica galaico-portuguesa propia do Camiño. Todo iso co galego como lingua vehicular, aínda que a actividade se pode adaptar a outros idiomas en función do público asistente.