Éxito rotundo das Festas do Outono do Pilar no Rosal, cunha fin de semana chea de cultura, memoria e comunidade

O Concello do Rosal viviu unha fin de semana de celebración, identidade e tradición coa nova edición das Festas do Outono do Pilar, que encheron o centro da vila de vida, música e memoria colectiva. Durante dous días, centos de rosaleiros e rosaleiras participaron nun programa variado que combinou patrimonio, cultura e produto local, reafirmando o vínculo da veciñanza coa súa historia e co territorio.

A alcaldesa, Ánxela Fernández Callís, destacou “a enorme resposta da veciñanza e o orgullo de ver como o pobo se implica cada ano máis nestas festas que manteñen viva a nosa memoria colectiva”. Engadiu ademais que “as Festas do Outono do Pilar son moito máis ca unha cita cultural: son unha expresión de comunidade, de recoñecemento ás nosas raíces e de compromiso co futuro”.

O programa comezou coa observación nocturna do ceo da man de Galicia Suroeste, continuando coas Xornadas do Patrimonio, nas que o investigador Manuel Lara Coira impartiu unha charla sobre as instalacións industriais en Galicia e a súa relevancia como patrimonio cultural, tomando como referencia o patrimonio industrial rosaleiro.

Un dos momentos máis esperados foi a Feira de Produtos do Rosal, que celebrou a súa cuarta edición consolidándose como un escaparate do mellor da produción local. Pan, doces, viños, aceites e outros produtos artesáns fixeron as delicias do público, nun ambiente festivo acompañado de música, xamón, polbo, gofres e sesión vermú.

A música tradicional tivo tamén un papel protagonista co Memorial Irmáns Flores, organizado pola Asociación de Gaiteiros da Xistra, no que participaron os grupos Airiños do Cereixo (O Rosal), Traspés (Vigo) e Alvariza (Teo). O son das gaitas e percusións encheu as rúas evocando o espírito das antigas murgas rosaleiras, unha das manifestacións culturais máis queridas da vila.

Non faltou tampouco a tradicional demostración dos cabaqueiros, que elaboraron tellas ao vivo na Praza do Calvario, nin o pregón e o espectáculo infantil que puxeron o broche final a unha fin de semana de convivencia e cultura popular.

Durante as festas, o público puido tamén visitar a exposición sobre o patrimonio inmaterial do río Miño, organizada pola AECT Río Minho, que permanecerá aberta na sala de exposicións do Concello ata o 26 de outubro, en horario de mañá.

Con esta edición, as Festas do Outono do Pilar confirman a súa posición como un dos eventos culturais máis emblemáticos do Rosal, un espazo de encontro que pon en valor o patrimonio, a tradición e o espírito comunitario da vila.