Exposicións, contacontos e recital poético: programación completa do Mes da Biblioteca en Tui

A Biblioteca Municipal de Tui vén de presentar a programación do Mes da Biblioteca, que este ano inclúe nove actividades culturais con motivo da celebración do Día da Biblioteca o 24 de outubro.

Desde 1997, esta efeméride é impulsada pola Asociación de Amigos del Libro Infantil y Juvenil, e co tempo sumáronse bibliotecas de todo o Estado. O lema elixido para 2025, “Contra a desinformación: bibliotecas”, pon en valor o papel esencial das bibliotecas públicas, escolares, universitarias e especializadas como espazos de acceso a información veraz e contrastada, fronte á desinformación. O cartel conmemorativo deste ano é obra da ilustradora Laura Wächter.

Actividades ao longo do mes

A programación deseñada pola Biblioteca Municipal abrangue propostas para diferentes públicos:

• Exposicións:

  • “Tui en letras”, no Paseo da Corredoira, con oito poemas vinculados á cidade.

  • “Destino: unha peregrinación”, mostra fotográfica de Manuel Valcárcel (Afundación), na Sala Municipal de Exposicións, do 9 de outubro ao 9 de novembro.

• Contacontos infantís (programa “Ler conta moito”):

  • Martes 7: “Viaxes e cancións dos ratos de Lonxedetodo” (Trinketrinke Teatro).

  • Martes 14: “Estás como unha cabra” (Lalá Teatro).

  • Martes 21: “O gato con contos” (Manuela Contacontos).

  • Venres 24: “A vez que vivín nun libro” (Lucía Aldao).

• Presentación literaria: o sábado 18, ás 19.00 h, terá lugar a presentación da primeira novela do tudense Alfonso Fontenla Fernández, titulada “La metáfora de las canicas”.

• Visita guiada: o mércores 8, ás 19.00 h, visita á biblioteca de cinema de Daniel Domínguez, conducida por Ángeles García, Ángel Sánchez e Pablo Comesaña (Play-Doc).

• Recital poético: o sábado 25, ás 17.30 h, no Paseo da Corredoira, promovido polo escultor Diego Giráldez, arredor da escultura dedicada a D. Ricardo García.

Un espazo de proximidade

A concelleira de Ensino, Cultura e Mocidade, Sonsoles Vicente Solla, destacou que a programación do Mes da Biblioteca busca consolidar á Biblioteca Municipal como un espazo de proximidade e encontro coa cidadanía, facilitando o acceso á cultura, ao coñecemento e á información de maneira libre, gratuíta e inclusiva.