Formoso enxalza o proxecto de Antonio Lomba: -estou seguro de que vai ter un respaldo masivo na guarda logo de todo o que leva feito-

O secretario xeral do PSdeG, Valentín González Formoso, enxalzou este sábado a capacidade de xestión e o proxecto “ilusionante” que propón Antonio Lomba para seguir transformando A Guarda, e sinalou que “estou seguro de que vai ter un respaldo masivo logo de todo que leva feito dende a súa chegada á alcaldía”, no ano 2015.

O líder do socialistas galegos tomou a palabra nunha cea-mitin, na que tamén interviron o secretario provincial, David Regades, o Delegado do Goberno en Galicia, José Ramón Gómez Besteiro, a secretaria xeral da agrupación local, Montse Magallanes. No seu discurso, dixo que Lomba é “un bo exemplo do que fan e do conseguen os socialistas cando chegan ao goberno”, que é xestionar, pedir e “petar en todas as portas que hai que petar” para conseguir melloras para o seu concello que redunden na calidade de vida dos seus veciños e veciñas.

Tamén chamou Formoso aos militantes e simpatizantes a “facer pedagoxía” nos lugares de traballo e de lecer para explicar que non é o mesmo que gobernen os socialistas ou que gobernen a dereita, pois advertiu que mentres o PP xestionou unha crise de calado aplicando recortes, Pedro Sánchez foi quen de “convencer aos socios europeos” para cambiar de paradigma e reaccionar con forza ante a pandemia, para investir no coidado das persoas e para saír en apoio do tecido produtivo e do emprego.

“É algo que sabedes moi ben na Guarda”, abondou Formoso, pois insistiu que Antonio Lomba é unha referencia no eido local no aproveitamento das posibilidades que ofrece Europa e os fondos Next Generation para o desenvolvemento dunha vila. Tamén o puxo de exemplo da defensa do sector pesqueiro levada a cabo en varias frontes, e que o PSdeG soubo tamén trasladar a Bruxelas e a Estrasburgo co seu rexeitamento activo ao veto á pesca de profundidade.

OPTIMISMO E SOLVENCIA

Pola súa banda, Antonio Lomba agradeceu en primeiro lugar, o apoio amosado polo seu partido coa presenza do secretario xeral e do secretario provincial, así como dous representantes do Goberno como son a Subdelegada na provincia de Pontevedra, Maica Larriba, e o propio Besteiro.

Lomba, que xa presume de experiencia logo de manter a alcaldía dende o 2015, reivindicou o seu “proxecto moi potente para o progreso da Guarda, para que a vila teña futuro” co que afrontan os comicios cun “mensaxe de optimismo” debido a que considera que “estamos facendo unha boa campaña” polo que están seguros de que obterán un gran resultado.

O seu maior argumento para lograr un terceiro mandato é a “solvencia” coa que chegaron a executar máis do 80% do programa electoral “a pesar da pandemia”, asegurou. Do mesmo xeito, puxo en valor que conseguiran para a vila un investimento de 7 millóns de euros dos Fondos Europeos. Recriminou á oposición do PP que “non está nin estivo á altura”, despois de estar “desaparecido” e “agora intentan tapar erros monumentais como o de votar en contra do pavillón municipal”.