Historia e igualdade: O Rosal visibiliza ás súas mulleres no Día Internacional da Muller

Este 8 de marzo, O Rosal conmemora o Día Internacional da Muller cunha iniciativa pioneira para reivindicar o papel das mulleres na historia do municipio. O roteiro guiado ‘8 Mulleres’ permitirá ás persoas participantes coñecer as historias de mulleres rosaleiras que foron fundamentais no desenvolvemento local, pero cuxo legado permaneceu, en moitos casos, silenciado.

A actividade dará comezo ás 10:00 horas desde a Casa do Concello e seguirá un itinerario circular urbano de 3 quilómetros con 8 paradas significativas. En cada unha delas abordarase a figura de mulleres concretas ou o impacto que tiveron no Rosal, así como espazos con legado feminino ou cunha ausencia destacada del. A participación é totalmente gratuíta, pero require inscrición previa chamando ao 986 625 000. Ademais, todas as persoas inscritas recibirán un agasallo conmemorativo.

A alcaldesa do Rosal, Ánxela Fernández Callís, subliñou a importancia desta iniciativa afirmando que "con este proxecto seguimos revolucionando mentes e reivindicando o papel fundamental que tiveron e teñen as mulleres na nosa historia e na nosa sociedade. O 8M é unha data clave para seguir recoñecendo os seus logros e loitas, avanzando cara a unha igualdade real".

Pola súa parte, a concelleira de Igualdade, Beatriz Rodríguez, destacou que "é fundamental sacar á luz todas esas historias femininas que quedaron agochadas e que non se poden atopar nos libros de historia. Con este roteiro non só recoñecemos ás mulleres do Rosal, senón que tamén reflexionamos sobre as desigualdades e os retos que aínda temos por diante".

A programación conmemorativa do 8M en O Rosal finalizará cunha concentración na Praza do Calvario ás 13:00 horas, onde a veciñanza poderá unirse para reivindicar os dereitos e a igualdade de todas as mulleres.