Homenaxe á deportista Estela Doiro no CEIP Manuel Rodríguez Sinde da Guarda

O mércores 29 de novembro o CEIP Manuel Rodríguez Sinde homenaxeou a unha das súas alumnas máis senlleiras. O acto serviu para inaugurar o muro denominado “Deporte en igualdade” do pavillón do centro no que se prevé ir recoñecendo a traxectoria das persoas da vila con maior relevancia neste campo. Esta actividade forma parte dos Contratos-Programa da Consellería de Educación.

Estela, unha das mellores deportistas da Guarda, foi a escollida pola súa vinculación ao centro como estudante na súa infancia e en visitas posteriores.

Previamente, na biblioteca do colexio, Estela asinou no libro de visitas da mesma e fíxose un visionamento dun vídeo con imaxes de momentos destacados da vida e da carreira da xogadora guardesa nos distintos equipos dos que formou parte e no seu paso polas seleccións galegas e española.

Xa no pavillón, tras un baile do alumnado de 3º de primaria, Estela recibiu un pequeno agasallo do centro e con posterioridade descubriu a lona que recoñece o seu labor no deporte e como referencia de esforzo, dedicación e paixón no seu ámbito.

Por último, o alumnado de 6º de educación primaria realizoulle unha entrevista na Radio Papaventos que xa se pode escoitar na web do centro no podcast correspondente ao programa 39 da emisora escolar.

Estela, que se amosou moi próxima e agarimosa coas nenas e nenos do Sinde, é un exemplo a seguir para todo o alumnado do centro que pode ver que unha rapaza que estudou nas mesmas aulas chegou a ser un referente tanto no deporte, grazas aos éxitos acadados, coma no camiño a seguir en prol da igualdade na sociedade.