Lara Meneses promove a creación dun polígono industrial en Tomiño

Os populares de Tomiño manifestan que “desde que goberna o BNG non houbo ningún intento de retomar o proxecto de polígono industrial exposto en Tomiño fai xa case dúas décadas”. Lara Meneses explica que “dende o PP de Tomiño sostemos que é unha prioridade facer que Tomiño creza”, e dese xeito, “crear oportunidades para todos, especialmente para a xuventude”.

A candidata popular propón comezar por “estudar o lugar idóneo para a súa localización e ver a posibilidade da conexión coa vía de alta capacidade”, asegurándose sempre de “crear o menor prexuízo para a saúde e o medioambiente”.

O PP tomiñés comprométese a promover unha primeira fase de 10 a 15 hectáreas nun lugar susceptible de ampliación de cara a unha maior demanda de chan industrial no futuro.

En “dar prioridade ás empresas locais neste novo espazo industrial, ás empresas do sector hortofrutícola e vitivinícola”, dando asi impulso a estes dous sectores claves para Tomiño é ao que se compromete Meneses para os próximos comicios municipais, que ademais asegura que “se o PP goberna nas próximas eleccións o proxecto levarase a cabo con total inminencia, entre os anos 23 e 27”.

Aproveitamento das relacións interfronterizas

O PP vai mais alá e aspira a aproveitar a proximidade coa fronteira con Portugal e “deixar de ver escapar as oportunidades como vén facendo ata o de agora co goberno do BNG, que deixou abandonado nun caixón toda posibilidade de xerar emprego no noso concello” en palabras da propia candidata á Alcaldía de Tomiño.