Luis López destaca o -rotundo apoio- do voto exterior a Alfonso Rueda na provincia de Pontevedra

O presidente provincial do PP de Pontevedra, Luis López, valorou esta mañá o resultado final das eleccións autonómicas do pasado 18 de febreiro despois de que culminara o reconto do CERA e o escrutinio xeral e destacou o “rotundo apoio” do voto exterior ao presidente Alfonso Rueda nesta circunscrición, o que permitíu apuntalar a vitoria dos populares superando o listón dos 230.000 votos.

En concreto, o PP engadíu na provincia un total de 3.609 papeletas dos electores do CERA ao resultado obtido hai oito días, o que lle confire un resultado final de 230.245 votos, que supón o 44,04% dos sufraxios válidos emitidos. “Xa estabamos moi satisfeitos do 43,97% e once deputados acadados na noite electoral, pero é certo que, aínda que pareza anecdótico, a lixeira suba cos votos da emigración, permitindo que superaramos o listón do 44%, supón outro motivo máis de ledicia”, manifestou Luis López.

O tamén presidente da Deputación de Pontevedra, que agradeceu o respaldo dos electores do exterior da provincia tras conceder un 48,95% e superar lixeiramente o nivel de apoio dos residentes presentes, recalcou que todos estes datos, xa definitivos, “veñen a consolidar e reforzar o magnífico resultado que a candidatura encabezada por Alfonso Rueda acadou na súa provincia e que, como xa dixemos, é o mellor dos últimos quince anos”.