Maica Larriba mantén unha reunión coas Forzas e Corpos de Seguridade do Estado na provincia para deseñar o operativo de seguridade ante o fin de ano

A subdelegada do Goberno en Pontevedra, Maica Larriba, presidiu hoxe a reunión telemática de coordinación cos principais mandos das Forzas e Corpos de Seguridade da provincia con motivo dos dispositivos de seguridade que se porán en marcha para garantir o cumprimento das normas sanitarias durante a noite de fin de ano.

A reunión desenvolveuse no marco das accións e operativos preventivos da loita contra o COVID-19 ante a alta incidencia e ritmo de contaxios na provincia e na Comunidade Autónoma. Neste sentido, os mandos policiais analizaron as previsións das limitacións e restricións impostas pola Xunta de Galicia dende a madrugada do 31 de decembro ata o 18 de xaneiro, tanto en relación cos novos horarios da hostalería e restauración como en aforos, toque de queda e ocio nocturno.

Os operativos deseñados para a cidade de Pontevedra pola Policía Nacional en colaboración coa Policía Local establecen un dispositivo especial para previr a celebración de botellóns e dar cumprimento as demais medidas restritivas impostas pola Xunta de Galicia fundamentalmente en zonas de ocio nocturno, parques e a praia fluvial.

En Vigo, a Policía Nacional activará un dispositivo especial de aninovo que reforzará a vixilancia na rúa de Príncipe, nas zonas de iluminación de Nadal e no entorno de Vialia, así como naquelas zonas onde a mocidade adoita reunirse para a celebración de botellóns. As actuacións levaranse a cabo en colaboración coa Policía Local e contarán coa apoio de equipos das Unidades de Prevención e Reacción (UPR).

Pola súa banda, a Garda Civil reforzará os servizos naquelas zonas que constitúan un previsible foco de problemas, prestando especial atención á franxa comprendida entre as 3 e as 6 horas da mañá. No caso de aparecer puntos con maior conflitividade, acudirán as unidades de reserva.

A subdelegada do Goberno destacou a importancia da colaboración e coordinación institucional como elementos fundamentais para minorar a propagación e transmisión comunitaria do virus. Non obstante, Larriba quixo insistir na “importancia da responsabilidade individual para frear esta nova onda, que está a ter unha importante incidencia en numerosos municipios da provincia”. 

Ademáis da subdelegada, tamén asistiron a comisaria xefa provincial da Policía Nacional, Estíbaliz Palma, a inspectora xefa accidental da Comisaría de Vigo-Redondela, Purificación Álvarez, o xefe accidental da Brigada Local de Seguridade Cidadá en Vigo, Antonio Fuentes, o tenente coronel da Garda Civil, Manuel Touceda, e a secretaria xeral da Subdelegación do Goberno en Pontevedra, María Isabel Alonso.