Maica Larriba participa na firma da Acta Anual de Recoñecemento Fronteirizo no Río Miño

A subdelegada do Goberno, Maica   Larriba, participou esta mañá no acto da sinatura da Acta de Recoñecemento da Liña de Fronteira no Río Miño, xunto con membros da Armada Española e da Marinha Portuguesa, ademais de con alcaldes e representantes dos Concellos galegos e Cámaras Municipais fronteirizas de Portugal. Concretamente, asinaron as actas os alcaldes de A Guarda, O Rosal, Tomiño, Tui, Salvaterra de Miño, As Neves e Arbo do lado español e os dos municipios de Caminha, Vilanova de Cerveira, Valença, Monçao e Melgaço do lado portugués.

Tras embarcar as autoridades españolas desde a Comandancia Naval de Tui no patrulleiro “Cabo Fradera”, foron ao encontro do patrulleiro portugués “Río Minho”. Coas dúas embarcacións fondeadas asináronse as actas de recoñecemento fronteirizo de maneira conxunta. Con este acto, que ten por obxecto examinar a parte fluvial da fronteira, dáse cumprimento ao recollido no artigo 15 do Tratado de Lisboa de 1864 no que se define a fronteira entre España e Portugal.

A Subdelegada do Goberno mostrouse moi satisfeita de participar, convidada pola Armada, “nun acto tan cargado de simbolismo que serve, ademais, para reforzar as relacións entre dous países irmáns, avanzar no intercambio de iniciativas e impulsar proxectos na fronteira do Miño”.

                                        Comandancia Naval do Miño

A Comandancia Naval do Miño, pertencente ao Ministerio de Defensa, é a institución encargada de velar polo cumprimento dos tratados internacionais subscritos entre España e Portugal relativos ao Tramo Internacional do Río Miño. O Comandante Naval copreside, xunto co Capitán do Porto de Caminha, a Comisión Permanente Internacional do Río Miño, máximo órgano de decisión sobre as propostas relativas ás condicións do Tramo Internacional do Miño.